दुर्ग, 21 मई 2020। सन 2018 म छत्तीसगढ़ के जवान मन के बनाए छत्तीसगढ़ी भाखा म बने फिलिम “स्प्लिटिंग शोल्डर्स” ह विश्व के प्रतिष्टित फिल्म फेस्टिवल कांन्स म अपन जगा बना के मनखे मन ल चकरित कर देहे रहिस। एखर पाछू कइयोन ठन फिलिम मन ल अंतर्राष्ट्रीय फिल्म फेस्टिवल तक पहुंचइया टीम रीलकाफील ह फेर एक फिलिम बनाए हे जेखर नाम हे – महाभारत चैप्टर -ii फिल्म के राइटर डाइरेक्टर रूपेश के बताती ओ ल सनातन धरम के पोथी मन अड़बड़ पसंद हे। वो ह हमेशा ए पोथी मन ले संसार बर कुछ अच्छा खोजत रहिथे अऊ इही कड़ी म वो ह ये फिलिम ल बनाए हे।
रूपेश के बताती आज के युवा पीढ़ी घलोक अब धरम-करम कोती लहुटत हे। एकर ताज़ा उदाहरण ये हे के सन् 80 के दशक के रामायण के जब फेर टीवी म प्रसारण होइस त एक पइत फेर मनखे मन उही आस्था अऊ भाव ले ओला देखिन। फिलिम के DOP अऊ एडिटर अविनाश बावनकर के बताती मनखे मन ह कई लड़इ लड़े हें अऊ करोड़ों मनखे के जान गए हे फेर आज घलो मनखे अपन अहंकार ल छोड़ नइ पावत हे, नतीजा ये हे के आज प्रकृति मनखे मन उपर अंधेर गुसियाए हे। फिलिम म इही बताए गए हे के अभीन के हालत म कइसे दुबारा महाभारत होए के स्थिति बनत हे।
