रायपुर, मुख्यमंत्री भूपेश बघेल ह जिला व्यापार अऊ उद्योग केंद्र बलौदाबाजार भाटापारा कोति ले प्रकाशित स्वरोजगार के बढ़ते कदम पुस्तक के विमोचन करिन। ये पुस्तक के विमोचन शहीद वीर नारायण सिंह के स्मृति म आयोजित शहादत दिवस अऊ श्रद्धांजलि समारोह सोनाखान के मुख्य मंच ले करिन। ये पुस्तक म राज्य सरकार के महत्वपूर्ण योजना ‘मुख्यमंत्री युवा स्वरोजगार’ के तहत स्वरोजगार ल अपनाके अपन जिंदगी म बदलाव लाय वाले सफल अउ प्रभावी हितग्राही मन के कहानी हे। जेन अब सफल उद्यमी बन के मनखे मन बर प्रेरणा बन गे हें।
पुस्तक म छत्तीसगढ़ के नवा औद्योगिक नीति 2019-24 समेत उद्योग विभाग के जम्मो जानकारी मुहैया कराए गए हे। ये पुस्तक के प्रकाशन कलेक्टर सुनील कुमार जैन के मार्गदर्शन म जिला व्यापार अउ उद्योग केंद्र बलौदाबाजार के महाप्रबंधक सत्येंद्र सिंह बघेल के विशेष प्रयास ले करे गए हे। पुस्तक विमोचन के अवसर म उद्योग मंत्री श्री कवासी लखमा, आदिम जाति अउ अनुसूचित जाति विकास मंत्री डॉ. प्रेम साय सिंह टेकाम, संसदीय सचिव द्वय श्री चंद्रदेव राय, सुश्री शकुंतला साहू, छत्तीसगढ़ पाठ्यपुस्तक निगम के अध्यक्ष श्री शैलेश नितिन त्रिवेदी, कृषक कल्याण परिषद के अध्यक्ष श्री सुरेन्द्र शर्मा, जिला पंचायत अध्यक्ष श्री राकेश वर्मा, वरिष्ठ समाजसेवी हितेंद्र ठाकुर संग आन जनप्रतिनिधि अउ आम नागरिक उपस्थित रहिन।
मुख्यमंत्री श्री भूपेश बघेल ह ‘स्वरोजगार के बढ़ते कदम’ पुस्तक के करिन विमोचन
