कोविड-19 वैश्विक महामारी ल दूर भगाए बर दंतेवाड़ा के दीदी मन ह उठाए हें बाना
दंतेवाड़ा 09 अप्रैल 2020। कोविड-19 वैश्विक महामारी के सेती उपजे ये कठिन स्थिति ले निपटे बर शासन कोति ले पूरा देश म 21 दिन के लॉकडाउन करे गए हे। लॉकडाउन के मतलब कुछ जरूरी सामान मन के दुकान मन ल छोड़ के आन सब कुछ बंद हे, अइसन स्थिति म मनखे मन के आगू ये महामारी ले सुरक्षा के संगें-संग दैनिक उपयोग म अवइया सामान मन के उपलब्धता ह घलोक एक बड़का समस्या हे अइसन म जिला के राष्ट्रीय ग्रामीण आजीविका मिशन बिहान के अंतर्गत स्व-सहायता समूह के दीदी मन ह आगू बढ़के कोविड-19 के तहत जारी एडवाईजरी के निर्देश के मुताबिक सामाजिक दूरी के विशेष ध्यान रखत कमान संभालत बहुत हद तक लॉकडाउन ल सफल बनाए म सहयोग प्रदान करत हें। जेखर तहत मास्क निर्माण, सेनेटाइजर निर्माण, बैंक सखी, डीजी पे, सुपोषण अभियान के तहत सूखा राशन घर पहुंच सेवा, वनधन विकास योजना, वाईआरएफ, सब्जी के आपूर्ति, सेनेटरी पैड निर्माण प्रमुखरूप ले सामिल हे।
मास्क के निर्माण- कोविड-19 ल फैले ले रोके बर कड़ी ल तोड़ना अड़बड़ जरूरी हे अऊ ये तभे संभव हे जब हरेक मनखे मास्क के उपयोग करत सोशल डिस्टेंसिंग बनाए रखंय, फेर जिला के अंतर्गत करीबन 03 लाख के जनसंख्या हे अतका संख्या म मार्केट म मास्क उपलब्ध नइ रहिस, ये बात ल ध्यान म रखत दंतेवाड़ा जिला के जम्मो जनपद पंचायत के करीबन 40 स्व-सहायता समूह के 193 दीदी मन कोति ले शासन के गाइडलाइन के मुताबिक अब तक 18246 मास्क निर्माण करके स्वास्थ्य विभाग, आंगनबाड़ी कार्यकर्ता अउ मनरेगा श्रमिक मन बर ग्राम पंचायत मन ल उपलब्ध कराए हें, जेखर से कि समूह मन ल करीबन 2 लाख 73 हजार रूपिया के आय घलोक होए हे अउ मास्क निर्माण के काम सरलग चलत हे।
सेनेटाइजर निर्माण- दंतेवाड़ा जिला के चार स्व-सहायता समूह कोति ले आज तक करीबन 200 लीटर सेनेटाइजर के निर्माण कर के जिला चिकित्सालय, एनएमडीसी, बैंक सखी मन ल निशुल्क उपलब्ध कराए गए हे, सेनेटाइजर निर्माण बर स्व-सहायता समूह मन ल कच्चा मटेरियल अउ मानदेय के रूप म एनएमडीसी सीएसआर मद ले 29 हजार रूपिया देहे गए हे।
मुख्यमंत्री सुपोषण अभियान अंतर्गत सूखा राशन घर पहुंच सेवा- लॉकडाउन के समय दुसर समस्या सूखा राशन सामान, सुपोषण योजना के अंतर्गत हितग्राही मन ल उपजब्ध कराना हे, काबर के शासन कोति ले सख्त निर्देश हे के कोनो बाहिर झन निकले, अइसन स्थिति म समूह के दीदी मन ह जिला प्रशासन के मदद ले हितग्राही मन तक सूखा राशन घर पहुंच सेवा चालू करे हें जेखर तहत जिला के सबो जनपद पंचायत के जम्मो गांव मन म 258 समूह के माध्यम ले 18111 हितग्राही मन तक सूखा राशन पहुंचाया जात हे।
अइसनहे बैंक सखी, वीआरएफ राष्ट्रीय ग्रामीण आजीविका मिशन बिहान, वनधन विकास योजना, सब्जी के आपूर्ति,
सेनेटरी पैड निर्माण आदि अड़बड़ अकन काम दीदी मन करत हें। वैश्विक महामारी के ये संकट काल म दंतेवाड़ा जिला के स्व सहायता समूह मन के दीदी मन के ये काम सिरतोन म हमला प्रेरणा देथे संगेच ये विपत्ति के घड़ी ले निकले बर हमला प्रेरित तको करथे।
