उत्तर बस्तर कांकेर, 23 जून 2020। राज्य सरकार ह नरवा, गरूवा, घुरूवा अऊ बाड़ी योजना संचालित करत हे, जउन म नरवा के सुधार, घुरवा म खाद के बनई अऊ बाड़ी म सब्जी भाजी उपजाए बर किसान मन ल प्रोत्साहित करे जात हे। ये गौठान ल बहुउद्देशीय केन्द्र के रूप म विकसित करे जात हे, जेमा कई गतिविधि मन बर महिला स्व-सहायता समूह मन ल दायित्व सउंपे गए हे। गौठान म महिला स्व-सहायता समूह मन ह जैविक खाद के निर्माण, फेंसिंग पोल के निर्माण, सब्जी उत्पादन आदि गतिविधि संचालित करत हें।
कांकेर जिला के नरहरपुर विकासखण्ड के ग्राम श्रीगुहान म पाछू छै महीना ले गौठान संचालित करे जात हे, जेमां श्रीगुहान के जय मॉ लक्ष्मी स्व-सहायता समूह के दस महिला सदस्य मन ह सब्जी उत्पादन के काम करत हें, लॉकडाउन के समय म घलोक उमन करीबन डेढ़ लाख रूपिया के आमदनी पाए हें। नोवल कोराना वायरस के संक्रमण ले बचाव बर लॉकडाउन के बेरा म महिला स्व-सहायता समूह मन के सदस्य मन घर-घर सब्जी बेचके डेढ़ लाख रूपिया के कमाई करे गए हे। जय मॉ लक्ष्मी स्व-सहायता समूह के सदस्य श्रीमती अमिता वट्टी अऊ अमोत्री सलाम ह बताइस के गौठान म सब्जी उत्पादन करे बर पंचायत के माध्यम ले बोर खेदवाए गए हे। गौठान के जमीन म समूह के महिला मन कड़क मेहनत करके लौकी, करेला, बरबट्टी, चेचभाजी, कद्दू, लालभाजी, टमाटर, बैगन, धनिया पत्ति आदि सब्जी उत्पादन करके मनखे मन के घर पहुच सुविधा के माध्यम ले सब्जी बेचके आय अर्जित करत हें। एखर अलावा स्व-सहायता समूह के सदस्य मन आस-पास के गांव अऊ हाट बजार मन म घलोक जाके सब्जी बेचे जात हे।
उमन बताइस के सरकार जइसे चाहत हे तइसे स्व-सहायता समूह के सदस्य मन गौठान के जमीन म हरियर चारा के घलोक उत्पादन करत हें, जेखर से पशु मन ल ताजा अउ हरियर चारा मिलत हे। गौठान के डेढ़ एकड़ जमीन म जोताई के काम पंचायत के माध्यम ले करे गए हे अऊ लउहे सब्जी लगाय के काम फेर शुरू होवइया हे। स्व-सहायता समूह के सदस्य मन ह गौठान योजना संचालित करे बर प्रदेश के मुख्यमंत्री श्री भूपेश बघेल के प्रति आभार व्यक्त करे हें।
