दुर्ग 7 अप्रैल 2020। एरिया लेवल फेडरेशन अउ महिला स्व सहायता समूह के महिला मन घलोक अब जरूरतमंद मन ल सहायता करत हें। लॉक डाउन होए के सेती कई जरूरतमंद मन ल कई संगठन, समुदाय, समाजसेवी, व्यापारी आदि मन राशन अउ आन जिनिस देके सहायता करत हें। इही कड़ी म महिला स्व सहायता समूह अउ एरिया लेवल फेडरेशन के महिला मन घलोक जरूरतमंद मनखे मन ल राशन अउ हरियर साग-भाजी बांटत हें। महिला मन अपन समूह के उत्थान बर जउन पइसा सकेले रहिन तेन पईसा ले अब वो मन राशन अउ सब्जी बिसा के जरूरतमंद मन तक पहुंचाए के काम करत हें।
नारी शक्ति अउ अंबेडकर के महिला मन ह प्रगति नगर अउ शांति नगर कैंप एक क्षेत्र म 25 मनखे मन ल चावल, चना, आलू, प्याज अउ हरियर सब्जी बाटिंन हे। दीपज्योति एरिया लेवल फेडरेशन के महिला मन शंकर पारा, चिंगारी पारा, सुपेला के 23 परिवार ल चावल, तेल, नमक, दाल, हल्दी अउ हरियर साग-भाजी दीन। शुभ एरिया लेवल फेडरेशन के महिला मन वैशाली नगर के आश्रय स्थल म अस्थाई रूप ले निवासरत बेसहारा मनखे मन ल शक्कर, चाय पत्ती, तेल अउ सबो बर साबुन के व्यवस्था करे हें। महाशक्ति महिला स्व सहायता समूह के महिला मन सेक्टर 6 के 60 परिवार ल चावल, दाल, मसाला, डालडा, बेसन आदि मुहैया कराईन हें। भूखे मनखे मन के मदद करे बर अब महिला मन घलोक पीछू नइ हे 9 एरिया लेवल फेडरेशन अउ 11 महिला स्व सहायता समूह के महिला मन घलोक जरूरतमंद मन के मदद करत हें।
