महासमुंद, मुख्यमंत्री श्री विष्णु देव साय के मंशा के मुताबिक राज्य के महिला मन के आर्थिक सशक्तिकरण के विशेष प्रयास करे जात हे। कई ठन विभाग कोति ले चलाए जात हितग्राहीमूलक योजना मन ले जोड़के ओ मन ल आर्थिक गतिविधि मन म जोड़ के उमन ल लाभ के अवसर देहे जात हे। ग्रामीण आजीविका मिशन ले जुड़के विशेष प्रशिक्षण प्राप्त करके महिला मन व्यवसाय चालू करके आत्मनिर्भर होवत हे।
महासमुंद जिला के ग्राम गुलझर के महिला मन ह ये सिद्ध कर देखाय हें के आत्मनिर्भरता के रद्दा दूर नइ हे, कहूं सही दिशा, दृढ़ इच्छाशक्ति अऊ सामूहिक प्रयास संग होही। साल 2019 म गठित जय बड़ादेव महिला स्व-सहायता समूह ह स्थानीय संसाधन मन के उपयोग करके आजीविका के सशक्त साधन तैयार करे हें अऊ अपन आर्थिक स्थिति ल नवा दिशा देहे हें।
बकरी पालन ल बनाय आय के स्थायी माध्यम
समूह के अध्यक्ष श्रीमती गोमती ध्रुव बताथे के उमन शुरुआत म बकरी पालन ल एक व्यवसाय के रूप म अपनाइन, काबर के ये ग्रामीण परिवेश म कम लागत अऊ कम प्रशिक्षण म घलोक लाभकारी साबित हो सकत हे। ऊंखर मुताबिक बकरी पालन सिरिफ पशुपालन नइ, बल्कि आत्मनिर्भरता कोति बढ़े के एक प्रभावी माध्यम बन गए हे।
बिहान योजना ले मिलीस आर्थिक ताकत
बकरी पालन के शुरुआत उमन बिहान योजना के अंतर्गत 1 लाख रूपिया के करजा ले के करे रहिन। नियमित किस्त चुकाए के बाद ओ मन ऋणमुक्त होइन अऊ फेर सरलग 2 लाख अऊ 4 लाख रूपिया के करजा लेके व्यवसाय ल बढ़ाइन। समय म करजा अदायगी के फलस्वरूप समूह ल 15 हजार रूपिया के रिवॉल्विंग फंड अऊ 60 हजार रूपिया के सामुदायिक निवेश कोष घलोक प्राप्त होइस।
बकरी खाद ले अकतहा आय अऊ बाजार म मांग
आज समूह के 8 महिला सदस्य मन तीर चार ले पाँच बकरी हे। ओ मन न केवल बकरी पालन करत हें, बल्कि ओखर से उत्पादित जैविक बकरी खाद ल तैयार करके बाज़ार म बेचत हें, जेखर से हर एक महिला ल प्रति महिना 4 ले 5 हजार रूपिया के अकतहा आय होवत हे। बकरी खाद के गुणवत्ता अऊ जैविक प्रकृति के कारन एखर मांग पुणे जइसे बड़े शहर मन म घलोक हावय।
आकांक्षा हाट म शानदार प्रदर्शन
हाले म जिला पंचायत परिसर म आयोजित आकांक्षा हाट म समूह कोति ले लगाए गे स्टॉल म बकरी खाद ल मनखे मन के जबरदस्त प्रतिसाद मिलीस। एखर से महिला मन के उत्साह अऊ आत्मविश्वास बाढ़े हे।
प्रेरणास्रोत बनिस ग्रामीण महिला मन
श्रीमती गोमती ध्रुव अऊ उंखर साथी महिला मन ह ये सिद्ध कर देखाइन के कहूं ग्रामीण महिला मन संगठित होके काम करंय अऊ शासन के योजना मन के सही लाभ उठावंय, त न केवल ओ मन अपन आजीविका ल सशक्त बना सकत हें, बल्कि आन महिला मन बर प्रेरणा के स्रोत घलोक बन सकत हें। समूह के महिला मन बिहान योजना अऊ आन आजीविका उन्मुख सरकारी योजना मन बर शासन के आभार व्यक्त करत हें, जे ह ओ मन ल ये मंच अऊ अवसर देहे हे।
