सौर ऊर्जा ले आत्मनिर्भर बनिस ग्राम परसदा के अजय पटेल

प्रधानमंत्री सुरुज घर मुफ्त बिजली योजना ले मिलीस राहत 
रायपुर, प्रधानमंत्री सुरुज घर मुफ्त बिजली योजना ह गांव-गांव के आम परिवार मन ल ऊर्जा आत्मनिर्भरता के रद्दा देखाए हे। ये योजना बिजली बिल ले राहत देवत हे संगेच उपभोक्ता मन ल ऊर्जा उत्पादक के रूप म घलोक सशक्त बनावत हे। ग्राम परसदा के रहवइया अजय पटेल एखर उदाहरण हे। अजय पटेल ह अपन घर के छत म 3 किलोवाट क्षमता के रूफटॉप सोलर प्लांट स्थापित करे हे। जून 2025 म वोखर प्लांट ले 171 यूनिट बिजली के उत्पादन होइस, जेखर से ओ ल 79 रुपिया के छूट मिलीस। उहें जुलाई 2025 म उत्पादन बढ़के 190 यूनिट तक पहुँचिस, जेखर परिणामस्वरूप ओ ल 250 रुपिया के छूट मिलीस।
अजय पटेल बताथे के अब हर महिना बिजली बिल चुकाए के चिंता ले मुक्ति मिल गए हे। बचत ले घर के आन खर्च पूरा करे म आसानी होवत हे अऊ परिवार ल आर्थिक मजबूती मिलत हे। ओखर मानना हे के प्रधानमंत्री सुरुज घर मुफ्त बिजली योजना आमजनता खातिर वरदान साबित होवत हे। ये योजना केवल एक परिवार तक सीमित नइ हे, बल्कि पूरा समाज ल हरित भविष्य अऊ स्वच्छ ऊर्जा के दिशा म अग्रसर करत हे। रूफटॉप सोलर प्लांट ले मिलइया बिजली ले आर्थिक बोझ कम होवत हे, संगेच पर्यावरण संरक्षण म घलोक योगदान मिलत हे।
प्रधानमंत्री सुरुज घर मुफ्त बिजली योजना के लाभ लेहे खातिर उपभोक्ता ऑनलाइन पोर्टल या पीएम सुरुज घर मोबाइल ऐप, सीएसपीडीसीएल के वेबसाइट, मोर बिजली ऐप अऊ टोल फ्री नंबर 1912 के माध्यम ले आवेदन कर सकत हें। संगेच, उपभोक्ता अपन अनुकूल वेंडर के चयन घलोक ऑनलाइन कर सकत हें।