दुर्ग, 18 अप्रैल 2020। कोरोना संक्रमण ले बचाव अउ रोकथाम बर मेडिकल कॉलेज चिकित्सालय राजनांदगांव अउ दुर्ग जिला म बनत विशेषीकृत कोविड-19 अस्पताल के आज राष्ट्रीय स्वास्थ्य मिशन के संचालक डॉ. प्रियंका शुक्ला, संचालक चिकित्सा शिक्षा डॉ. एस. एल. आदिले के संग स्वास्थ्य विभाग के अधिकारी मन के टीम ह निरीक्षण करिस।
डॉ. प्रियंका शुक्ला ह राजनांदगांव म कोविड-19 के पॉजीटिव मरीज मन बर अलग से प्रवेश अऊ निकासी, सामान्य बुखार अउ फ्लू के मरीज मन बर अलग ओपीडी अऊ संदेहास्पद मरीज मन ल भर्ती करे बर अलग से व्यवस्था करे के निर्देश अधिकारी मन ल देहे गीस। उमन टेली आईसीयू के व्यवस्था करे अउ उपलब्ध संसाधन मन के मुताबिक कार्ययोजना बनाए के अउ कोविड-19 के वारियर्स के ड्यूटी अऊ क्वारेंटीन के व्यवस्था के संबंध म घलोक अधिकारी मन ल जरूरी दिशा-निर्देश दीन। दुर्ग जिला के कोविड-19 अस्पताल के निरीक्षण के समय टीम ह कोरोना ले बचाव अउ उपचार संबंधी व्यवस्था के बारे म मुख्य चिकित्सा अउ स्वास्थ्य अधिकारी ले जानकारी लीन। अधिकारी मन ल आपात स्थिति म एम्बुलेंस के व्यवस्था, पॉजीटिव प्रकरण के लाय अऊ पहुंचाए, आईसीयू म वेंटीलेटर अउ हर एक बिस्तर म मॉनिटर स्क्रीन, सेंट्रलाइज्ड ऑक्सीजन सप्लाई, बॉयो मेडिकल वेस्ट अउ आन जरूरी प्रबंध करे के निर्देश देहे गीस। टीम ह डॉक्टर मन अउ लैब टेक्नीशियन मन ल देहे जात प्रशिक्ष्ण के सम्बन्ध म विस्तार ले चर्चा करिन। कोविड-19 के सैंपल कलेक्शन म लगे अधिकारी मन अउ कर्मचारी मन के टीम के संक्रमण ले बचाव बर विशेष ध्यान देहे अउ आपात स्थिति म बैकअप प्लान के तहत आन अस्पताल मन ल घलोक चिन्हांकित करके जरूरी इंतजाम ठउका करे ल कहिन। डॉ. प्रियंका शुक्ला ह मेडिकल कॉलेज चिकित्सालय राजनांदगांव के संचालक अउ दुर्ग कलेक्टर श्री अंकित आनंद ले चर्चा करिन। एखर पाछू राज्य स्तरीय टीम ह जिला के आला अधिकारी मन के संग बैठक करके अब तक करे गए तियारी मन के समीक्षा करिन।
