आवेदन के 24 घंटा के भीतर मिलीस सहायता राशि: परिवार ह जताइस आभार
रायपुर, 26 नवम्बर 2020। बिलासपुर जिला म करीबन ढाई साल पहिली होए सड़क दुर्घटना म घायल मरीज के इलाज बर मुख्यमंत्री श्री भूपेश बघेल ह, मरीज के गंभीर स्थिति ल देखत तुरंत एक लाख रूपिया के सहायता मंजूर करे हे। मुख्यमंत्री के ये संवेदनशील पहल बर परिवार के मनखे मन ह आभार व्यक्त करे हें।
बिलासपुर जिला के विकासखंड तखतपुर निवासी श्रीमती भगवती यादव के बताती ढाई बछर पहिली वोखर बेटा जय यादव के सड़क दुर्घटना के सेती ब्रेन हेमरेज हो गए रहिस। श्रीमती भगवती यादव के पारिवारिक स्थिति अच्छा नइ हे। वोखर बेटा के आय ले ही परिवार के खरचा चलत रहिस, फेर दुर्घटना के बाद परिवार के माली स्थिति अऊ खराब होत गीस। श्रीमती भगवती के आगू अब परिवार चलाय के संगेच बेटा के इलाज करवाना घलोक एक समस्या रहिस। उमन जिहां संभव हो सकिस उहां आर्थिक मदद बर गोहार लगाईन, फेर वोखर समस्या के समाधान नइ हो सकीस।
श्रीमती भगवती यादव ह अपन बेटा के इलाज बर मुख्यमंत्री ले गोहार लगाईस। वोकर आवेदन मिले के 24 घंटा के भीतर वोकर बेटा के इलाज बर एक लाख रूपिया के सहायता पास कर देहे गीस। ये राशि कलेक्टर बिलासपुर ह रेडक्रास सोसायटी बिलासपुर के माध्यम ले दीस।
