स्वामी आत्मानंद उत्कृष्ट अंगरेजी माध्यम स्कूल म पढ़हीं दुनों लइका
बिलासपुर, प्रदेश के संवेदनशील मुख्यमंत्री श्री भूपेश बघेल के संवेदनशील पहल ले आज दू गरीब लइका मन के भविष्य सुरक्षित हो गे। अब ये दुनों लइका स्वामी आत्मानंद उत्कृष्ट अंगरेजी माध्यम म पढ़हीं संगे संग ऊंखर परिवार ल घलोक छत मिल गए हे।
मुख्यमंत्री श्री भूपेश बघेल ल एक समाचार पत्र के माध्यम ले आठ साल के बालिका कुमारी गंगा साहू अऊ छे साल के बालक अरूण साहू के बारे म पता चलिस। श्री बघेल ह तुरंते बिलासपुर कलेक्टर डॉ. सारांश मित्तर ल निर्देश दीन कि ए लइका मन बर तुरंत शिक्षा अऊ इंकर परिवार बर घर के व्यवस्था ठउका करे जाए, जेखर से लइका मन के भविष्य सुरक्षित हो सकय। कलेक्टर ह जिला शिक्षा अधिकारी ल ये संबंध म निर्देश दीन। निर्देश ल अमल म लात स्वामी आत्मानंद उत्कृष्ट अंगरेजी माध्यम स्कूल लिंगियाडीह म बालिका गंगा ल कक्षा दुसरी म अऊ बालक अरूण साहू ल कक्षा पहली म आजेच प्रवेश देवाए गीस। कलेक्टर ह उमन ल कार्यालय बलाके गणवेश, पाठ्य पुस्तक अऊ अध्ययन बर आन जरूरी साम्रगी घलोक प्रदान करिन।
ए लइका मन के परिवार तीर रहे बर घर घलो नइ हे, ते खातिर लइका मन के स्कूल के तीरेच म परिवार ल कलेक्टर के निर्देश म नगर निगम कोति ले राजकिशोर नगर म आईआरडीपी योजना के तहत निर्मित घर उपलब्ध कराए गीस। लइका मन के पिता गणेश राम साहू जेन किराया म रिक्शा लेके चलाथे अऊ अपन जीवन यापन करथे। वो ह बताइस कि रेलवे क्षेत्र म स्थित झोपड़ापारा म ओखर निवास रहिस, फेर मकान म टूट-फूट होए ले ओ मन बेघर हो गए रहिन। परिवार के विकट समस्या के चलते ऊंखर लइका मन के पढ़ाई घलोक बाधित हो गए रहिस। लइका मन के पढ़े के ललक ल देखत ओ मन उंखर शिक्षा जारी रखे बर उदीम करत रहिन। मुख्यमंत्री श्री भूपेश बघेल के मानवीय पहल ह ऊंखर लइका मन के भविष्य सुरक्षित कर देहे हे। जेखर बर मुख्यमंत्री अऊ जिला प्रशासन के ओ मन बहुत आभारी हें।
