रेशम उत्पादन केन्द्र म महिला मन ल देहे जात हे टसर धागाकरण प्रशिक्षण

कोण्डागांव, जिला म रेशम के उत्पादन अऊ ओखर प्रसंस्करण ल बढ़ावा देहे बर मुख्यमंत्री रेशम धागाकरण मिशन अऊ जिला कौशल विकास प्राधिकरण के अंतर्गत 31 मार्च ले शासकीय रेशम उत्पादन केंद्र मसोरा म महिला हितग्रहि मन ल टसर धागाकरण प्रशिक्षण के शुभारंभ करे गीस। ये संबंध म रेशम विभाग के सहायक संचालक वेणी कश्यप ह बताइस कि जिला म उत्पादित टसर कोसाफल के स्थानीय स्तर म रेशम मिशन के अन्तर्गत धागाकरण करके स्वरोजगार के अवसर के सृजन करे जात हे। एखर से ये प्राकृतिक उत्पाद के मूल्य संवर्धन के संग ही स्थानीय गांव वाले मन ल बड़का पैमाना म रोजगार घलोक मिलत हे अऊ पहिली जेन कोसा जिला ले बाहिर भेजके धागाकरण करे जात रहिस ओला अब जिला म ही धागाकरण करे जा सकही। पहिली चरण म जिला म कुल 130 महिला हितग्राही मन के चयन करके मुख्यमंत्री कौशल विकास योजना अन्तर्गत एक हितगग्राहि मन ल 200 घण्टा के प्रशिक्षण पंजीकृत प्रशिक्षणदाता कोति ले दे जाही।
प्रशिक्षण के बाद सबो हितग्राही मन ल धागाकरण मशीन जिला प्रशासन के सहयोग ले देहे जाही। जेखर से ओ मन धागाकरण काम करके खुद के रोजगार स्थापित कर सकयं। ए चुने गए अऊ प्रशिक्षित महिला हितग्राही मन ल 15 ले 20 सदस्य मन के स्व सहायता समूह के रूप म गठित करके ओ मन ल टसर कोसा के रूप म कच्चा माल के उपलब्धता अऊ उत्पादित धागा के विक्रय ले संबंधित व्यवस्था के संबंध म विस्तृत जानकारी कौशल प्रशिक्षण के समय दे जाही। ये बेरा म सहायक संचालक वेणी कश्यप, सहायक परियोजना अधिकारी पुनेश्वर वर्मा संग आन अधिकारी उपस्थित रहिन।