सेवा सेतु के माध्यम से राजेश्वरी ल दू दिन म मिलिस आय प्रमाण पत्र

डिजिटल सेवा से मिलिस सुविधाजनक, पारदर्शी अउ समयबद्ध सेवा

मुंगेली, शासन के डिजिटल सेवा मन अब आम नागरिक मन बर सुबिधाजनक, पारदर्शी अउ समय म काम पूरा करे के एक मजबूत माध्यम बनत हे। मुंगेली के लोक सेवा केंद्र (तहसील आफिस परिसर) म चलत सेवा सेतु पोर्टल हा एक ठन छात्रा के भविस ला समय म नवा रस्ता दे के काम करिस। सुरीघाट के रहइया राजेश्वरी निषाद ला स्कूल म भरती बर आय प्रमाण पत्र के जरूरत रहिस। प्रमाण पत्र नइ मिले के चिंता से परिवार हा परेशान रहिस अउ नाम लिखाय के काम रुके के डर बने रहिस।
इही बीच राजेश्वरी के ददा श्री भगवत निषाद हा लोक सेवा केंद्र पहुंचिस। उहाँ बइठे सेवा सेतु के कर्मचारी मन हा जरूरी कागज मन के जांच करके ऑनलाइन आवेदन के बूता ला पूरा करिन अउ कागज ला पोर्टल म अपलोड कर दीन। आवेदन के तुरते निराकरण करत सिर्फ दू दिन के भितरी आय प्रमाण पत्र जारी कर दे गीस। समय म प्रमाण पत्र मिल जाय ले राजेश्वरी के भरती बिना कोनो रुकावट के पूरा हो गे। परिवार हा सेवा सेतु के तुरते, पारदर्शी अउ जनता के हित म काम करे के तरीका के तारीफ करत जिला प्रशासन अउ लोक सेवा केंद्र खातिर आभार जताइस।
जानबा हे के सेवा सेतु के माध्यम से नागरिक मन ला आय, जाति अउ निवास प्रमाण पत्र के संग कइ सुबिधा ऑनलाइन देहे जात। एकर से लोगन मन ला घेरी-बेरी आफिस के चक्कर नइ काटे बर परय अउ तय समय के भितरी योजना मन के लाभ आसानी से मिलत हे। डिजिटल इंडिया के सपना ला पूरा करत सेवा सेतु हा आम नागरिक मन तक सोझ, पारदर्शी अउ तुरते सेवा पहुंचाय के एक बड़का माध्यम बनत हावे। ए पहल से न केवल समय बाचत हे, बल्कि शासन अउ जनता के बीच बिसवास घलो मजबूत होवत हे।