सेवा सेतु ले असान होईस सासकीय सेवा मन के रद्दा

कोरबा, सासन के बड़का उदिम ‘सेवा सेतु पोर्टल’ मनखे मन ला सासकीय सेवा सरल, सुलभ अउ पारदर्शी तरीका ले देवाय म कारगर साबित होवत हे। ए पोर्टल के माध्यम ले अलग-अलग प्रमाण-पत्र अउ दूसर सासकीय सेवा मन बर ऑनलाइन अरजी देके तय समय-सीमा म लाभ लेहे जाथे। एकर ले मनखे मन के समय अउ पइसा दूनो बांचत हे अउ कार्यालय के बिना मतलब के चक्कर लगाय के जरूरत घलो नई परत हे।
कोरबा जिला के पोड़ी उपरोड़ा तहसील के सुतर्रा गांव के रहइया कुमारी निधि सेन ह सेवा सेतु के माध्यम ले समयबद्ध सेवा के लाभ पाईस। ओहा निवास प्रमाण-पत्र बर सुतर्रा गांव म बने लोक सेवा केंद्र म अरजी देहे रहिस। पटवारी प्रतिवेदन के संग जम्मो जरूरी कागजात मन के पूरा होय के बाद, ओकर अरजी ह तय नियम के मुताबिक समय म निपटाय गीस अउ ओला सिरिफ एक हफ्ता के भीतर निवास प्रमाण-पत्र मिल गीस।
निधि ह बतईस के अरजी देहे ले लेके प्रमाण-पत्र मिले तक के जम्मो बुता ह एकदम सहज, पारदर्शी अउ सुभीता वाला रहिस। ओला कोनो कार्यालय के बिना मतलब के चक्कर नई काटे बर परीस, जेकर से समय अउ आर्थिक खरचा दूनो बांच गीस। ओहा कहिस के सेवा सेतु पोर्टल के माध्यम ले सासकीय सेवा तक आम मनखे मन के पहुंच पहिली के तुलना म अउ जादा सरल अउ असान हो गे हे। ओहा सासन के ए जनहितैषी उदिम बर खुसी जताइस अउ कहीस के सेवा सेतु ह सरकारी काम-बूता के प्रति लोगन मन के बिसवास ला बढ़ाय हे। तय समय म, पारदर्शी अउ जवाबदेह सेवा वितरण के ए बेवस्था ह सुसासन के रद्दा म एक बड़का कदम आय, जेकर से गांव-देहात के मनखे मन घलो असानी ले सासकीय सेवा मन के लाभ उठावत हें।