छत्तीसगढ़ म 17 सितंबर ले शुरू होहि ‘सेवा संकल्प अभियान’, शिवरीनारायण म जलही एक लाख दीया

जांजगीर-चांपा, प्रधानमंत्री नरेंद्र मोदी के सार्वजनिक जीवन अउ राष्ट्रसेवा के 25 बछर पूरा होए के पाछू 17 सितंबर ले 17 अक्टूबर 2026 तक देश अउ प्रदेश म ‘सेवा संकल्प अभियान-2026’ चलाए जाही। सेवा, सुशासन अउ जनकल्याण ल केंद्र म रखके आयोजित ये अभियान प्रधानमंत्री मोदी के 25 बछर के राष्ट्रसेवा अउ राष्ट्र निर्माण के यात्रा ल जनभागीदारी के जरिये जन-जन तक पहुंचाए के महत्वपूर्ण अवसर बनही।
इही कड़ी म 17 सितंबर के संझा 7 बजे जांजगीर-चांपा जिला के शिवरीनारायण स्थित महानदी घाट म एक लाख दीप प्रज्वलित करे जाही। ये दीप प्रज्वलन प्रधानमंत्री मोदी के 25 बछर के राष्ट्रसेवा, जनसेवा के संकल्प अउ राष्ट्र निर्माण के यात्रा के प्रति सम्मान अउ शुभकामना के प्रतीक होही। जिला के ऐतिहासिक, धार्मिक, सांस्कृतिक अउ प्रमुख सार्वजनिक स्थल मन म घलो दीया जलाके सेवा, समर्पण अउ जनभागीदारी के संदेश देहे जाही।
सेवा संकल्प अभियान के दौरान प्रदेश म सेवा कार्य अउ जनकल्याणकारी योजना मन के प्रभावी क्रियान्वयन के संग समाज के अलग-अलग वर्ग के सहभागिता सुनिश्चित करे जाही। अभियान के माध्यम से नागरिक मन ल सेवा, सुशासन अउ राष्ट्र निर्माण के संघरा संकलप ले जोड़त प्रधानमंत्री नरेंद्र मोदी के विकसित भारत के संकल्प ल जनभागीदारी के व्यापक आधार देहे के प्रयास करे जाही।
जांजगीर-चांपा कलेक्टर जन्मेजय महोबे ह अधिकारी मन ल अभियान के अंतर्गत आयोजित होवइया गतिविधि मन के जरूरी तैयारी समय-सीमा म पूरा करे अउ सबो कार्यक्रम के प्रभावी क्रियान्वयन सुनिश्चित करे के निर्देश देहे हें। ओमन संबंधित विभाग मन ल 17 सितंबर ले 17 अक्टूबर तक सेवा अउ जनकल्याणकारी गतिविधि मन के आयोजन म सक्रिय सहभागिता सुनिश्चित करे के कहे हें।
जिला प्रशासन ह जिलावासी मन ले 17 सितंबर के संझा 7 बजे अपन-अपन घर मन म दीया जलाके प्रधानमंत्री नरेंद्र मोदी के जन्मदिन अउ ‘सेवा संकल्प अभियान-2026’ के ये खास अवसर म सहभागी बने के अपील करे हें। ओही बेरा म शिवरीनारायण के महानदी घाट म आयोजित एक लाख दीप प्रज्वलन समेत जिलाभर म होवइया अलग-अलग आयोजन म ज्यादा ले ज्यादा संख्या म सहभागिता के आग्रह करे गे हे।