सेवा संकल्प अभियान म डबरी निर्माण ले जोशमनि एक्का के परिवार ला मिलिस सिंचाई सुविधा अऊ मछरी पालन से उपराहा आमदनी

CHHATTISGARHI NEWS: अम्बिकापुर, छत्तीसगढ़ सरकार कोति ले संचालित ‘सेवा संकल्प अभियान’ अऊ ग्रामीण विकास के योजना मन ह ग्रामीण क्षेत्र के किसान मन के जिनगी ला बदले के काम करत हे। अम्बिकापुर विकासखंड के ग्राम पंचायत बकिरमा निवासी जोशमनि के परिवार बर खेत म बने डबरी ह एक बहुत बड़ वरदान साबित होवत हे। पहिली पानी के कमी अऊ सिंचाई के साधन नई होए के सेती जोशमनि के परिवार ला खेती-किसानी म भारी दिक्कत जात रहिस। फसल के पैदावार ऊपर पूरा असर परत रहिस अऊ आमदनी सीमित रहिस, जेकर सेती परिवार के गुजर-बसर करे म घलो पसीना छूटत रहिस। फेर शासन के सहायता ले जब खेत म डबरी के निर्माण होगे, त ओखर पूरा खेती किसानी के तरीका ही बदल गे।
डबरी बन जाए ले अब जोशमनि के खेत ला सिंचाई बर पानी के कमी नई होवत हे। ओ समय म फसल के सिंचाई करके बढ़िया पैदावार ले पात हे। सिंचाई के सुविधा मिल जाए के संगे-संग ओ ह डबरी म मछरी पालन के काम घलो सुरू कर देहे हे, जेकर से ओला उपरहा आमदनी मिलत हे। मछरी पालन अऊ खेती के दुगुना लाभ मिले ले जोशमनि के परिवार के आर्थिक स्थिति म सुघर सुधार आस्ते-आस्ते आत हे। अब परिवार ला ककरो आगू हाथ पसारे के जरूरत नई परत हे अऊ ओमन आत्मनिरभर बनके खुसहाली के जीवन बितावत हें।
ए प्रकार के ग्रामीणोन्मुख योजना मन के जरिए सरकार ह किसान अऊ ग्रामीण मन के जिनगी ला संवारे के जे संकल्प लेहे हे, ओखर वास्तविक लाभ धरातल म दिखत हे। सेवा संकल्प अभियान ह गोठ भर के योजना नोहे, बल्कि ये जमीन म उतर के लोगन के जीवन स्तर ल ऊंचा उठावत हे। जोशमनि जइसन ग्रामीण परिवार मन के सफलता के कहानी ए बात के प्रमाण हे के सही समय म मिले सरकारी सहयोग के सेती गरीब परिवार मन के जिनगी म अंजोर आ सकथे अऊ ओमन विकास के मुख्यधारा म जुड़ सकथें।