सासन के सेवा अब मनखे मन के दुवारी तक, सेवा सेतु ले राजकुमार टोप्पो ला बेरा म मिलिस आय प्रमाण पत्र

कोरबा, सरकार के योजना मन जब जरूरतमंद मन तक सुभीता ले पहुंचथे, त बदलाव ह सिरिफ कागज म नइ दिखय, बल्कि लोगन मन के जिनगी म नजर आथे। मुख्यमंत्री श्री विष्णु देव साय के अगुवाई म सासन के सेवा मन ला आम जनता तक सरल अउ सहज तरीका ले पहुंचाय के रद्दा म ‘सेवा सेतु’ ह एक ठन बड़का कड़ी बनत हे।
कोरबा जिला के ग्राम अरसेना, तहसील अजगरबहार के रहइया श्री राजकुमार टोप्पो ला अपन जरूरी काम बर आय प्रमाण पत्र के जरूरत रहिस। एकर बर उमन कलेक्टोरेट परिसर म बने सेवा सेतु केंद्र म जाके तय नियम के तहत अपन अरजी जमा करिन। सेवा सेतु केंद्र के माध्यम ले उमन के आवेदन म जरूरी काररवाई करे गिस अउ तय समय-सीमा के भीतर उमन ला आय प्रमाण पत्र दे देहे गीस। बेरा म प्रमाण पत्र मिल जाय ले श्री टोप्पो के जरूरी काम ह सुभीता ले पूरा हो गे।
श्री टोप्पो ह बताइन के सेवा सेतु केंद्र म आवेदन करे के तरीका बड़ सरल रहिस अउ उमन ला प्रमाण पत्र बर दफ्तर मन के अकारन चक्कर नइ काटे बर परिस। तय बेरा म सेवा मिले ले उमन ला भारी सुभीता होइस। उमन कहिन के सासन के अइसन पहल ले आम नागरिक मन ला सरकारी सेवा ह सहज, सरल अउ तय समय म मिलत हे। एकर बर उमन मुख्यमंत्री श्री विष्णुदेव साय अउ राज्य सरकार के आभार जतावत कहिन के ‘सेवा सेतु’ जइसन पहल ह सासन अउ जनता के बीच के दूरी ला कम करे म बड़ महत्वपूर्ण भूमिका निभावत हे।