विष्णुभोग चावल, कोसा कपड़ा, करी लाड़ू, अइरसा अऊ सीताफल संग आन सामान घलोक करहीं भेंट
कैबिनेट के सदस्य मन के संग जाही रामलला के दर्शन करे
रायपुर, 12 जुलाई, 2024। मुख्यमंत्री श्री विष्णु देव साय अऊ ऊंखर कैबिनेट के सहयोगी श्रीरामलला के दर्शन करे सनिच्चर के अयोध्याधाम जाहीं। मुख्यमंत्री ए बेरा म माता शबरी के पवित्र धरती शिवरीनारायण ले बोइर के टुकनी घलोक उपहार स्वरूप रामलला ल भेंट करहीं। एखर संगेच मुख्यमंत्री श्री साय विष्णुभोग चावल, कोसा कपड़ा, करी लाडू, अइरसा अऊ सीताफल संग आन सामान घलोक रामलला ल भेंट करहीं।
जानबा हे कि प्रभु श्रीराम ह शिवरीनारायण म ही माता शबरी के जूठा बोइर खाये रहिन। ये ननिहाल ले अपन भांचा राम ल भेंट होही। आप मन जानतेच हव के प्रभु श्रीराम के छत्तीसगढ़ के जनजातीय मनखे मन ले गहिर मया रहिस। माता शबरी के जूठा बोइर के कहानी रामायण के सबले मर्मस्पर्शी कहानी मन म ले एक हे।
मुख्यमंत्री अपन कैबिनेट के संग प्रभु श्रीराम के दर्शन करहीं अऊ प्रदेशवासी मन के सुख समृद्धि के कामना करहीं। जानबा हे कि अयोध्या धाम म श्रीरामलला के दर्शन बर प्रदेश के श्रद्धालु मन बर अयोध्याधाम श्रीरामलला दर्शन योजना घलोक संचालित करे जात हे जेखर से हजारों श्रद्धालु रामलला के दर्शन करत हें। योजना के शुभारंभ के समय मुख्यमंत्री ह कहे रहिन के जल्दीच ओ मन कैबिनेट के संग अयोध्या धाम म रामलला के दर्शन के सौभाग्य प्राप्त करे जाहीं।