मंत्री श्री अमरजीत भगत सामिल होइन अमर शहीद गैंद सिंह शहादत दिवस के कार्यक्रम म

रायपुर, संस्कृति अउ बालोद जिला के प्रभारी मंत्री श्री अमरजीत भगत अऊ महिला एंव बाल विकास मंत्री श्रीमती अनिला भेंडिया ह आज बालोद जिला के डौण्डीलोहारा विकासखण्ड के ग्राम संजारी म आयोजित अखिल भारतीय हल्बा, हल्बी आदिवासी समाज के महासभा म सामिल होइन। मंत्री मन ह महासभा म क्रांतिकारी अमर शहीद शिरोमणी गैंद सिंह शहादत दिवस दिवस म ओ मन ल श्रद्धांजलि अर्पित करिन। ये मौका म श्री भगत ह कहिन कि शहीद गैंद सिंह ल उंखर पुण्यतिथि म गर्व अऊ सम्मान के संग याद करे जात हे। उमन कहिन कि देश के आजादी बर बलिदान देवइया महान सपूत शहीद गैंद सिंह ल 20 जनवरी सन् 1825 के परलकोट के महल के आगू फांसी दिए गए रहिस। अइसन वीर सपूत ल छत्तीसगढ़ अऊ पूरा देश नमन करत हे। महिला अउ बाल विकास मंत्री श्रीमती अनिला भेंडिया ह आजादी बर बलिदान देवइया शहीद गैंद सिंह ल याद करत कहिन कि छत्तीसगढ़ महतारी के ये महान सपूत ल युगों तक सुरता करे जाही। कार्यक्रम ल विधायक श्री कुंवर सिंह निषाद अऊ श्री रामकुमार यादव ह घलोक सम्बोधित करिस। ये बेरा म हल्बा समाज के बहुत अकन पदाधिकारी मन संग अड़बड़ झन नागरिक मौजूद रहिन।