जगदलपुर म आकार लेहे लगिस राज्यस्तरीय शहीद गुण्डाधुर तीरंदाजी अकादमी

जगदलपुर, गणतंत्र दिवस के बेरा म जगदलपुर म मुख्यमंत्री श्री भूपेश बघेल ह घोषणा करे रहिन, वइसनहे शहीद गुण्डाधुर राज्य स्तरीय तीरंदाजी अकादमी के स्थापना के तैयारी शुरु हो गए हे। ये अकादमी म बस्तर के खिलाड़ी मन के संगें-संग राज्य के उत्कृष्ट तीरंदाज मन ल आवासीय अऊ गैर आवासीय उच्‍च स्तरीय प्रशिक्षण के सुविधा प्राप्त होही। खिलाड़ी मन ल विश्वस्तर के सुविधा उपलब्‍ध कराए के उद्देश्य ले अंतर्राष्ट्रीय मापदण्ड के मुताबिक जगदलपुर क्रीड़ा परिसर म 120 मीटर के सुरक्षित आरचरी रेंज तियार करे गए हे। ये मां इंडियन आरचरी के संग ओलम्पिक के इंवेन्ट रिकर्व अऊ कम्पाउंड के 50 – 60 खिलाड़ी एक संग एक समय म अभ्यास अऊ प्रशिक्षण प्राप्त कर सकहीं। 30 मीटर इंडोर आरचरी रेंज के घलोक सुविधा खिलाड़ी मन बर तियार करे गए हे, ताकि बरसात के दिन म घलोक प्रशिक्षण प्रभावित झ होवय। 50 गुना 30 मीटर के विशाल कवर्ड शेड संग ट्रेनिंग सेन्टर भवन म खिलाड़ी मन बर चेंजिंग रूम, रेस्ट रूम, प्रशिक्षक बर रूम, टेक्निीकल विडीयो एनालिसेस रूम, स्टोर रूम, आफिशियल लाउंच आदि के निर्माण करे गए हे।
अकादमी बर निरधारित मापदण्ड के आधार म खिलाड़ी मन के चयन करके ओ मन ल आवासीय प्रशिक्षण के संग शिक्षा आदि के घलोक सुविधा प्रदान करे जाही। प्रशिक्षण बर स्थानीय प्रशिक्षक के संगें-संग अंतर्राष्ट्रीय प्रतियोगिता, ओलम्पिक आदि म पदक प्राप्त खिलाड़ी या उंखर संस्था ले अनुबंध करके विश्वस्तरीय प्रशिक्षक नियुक्त करे जाही। एखर से राज्य के खिलाड़ी घलोक ओलम्पिक, एशियाड, कॉमनवेल्थ जइसे अंतर्राष्ट्रीय स्पर्धा मन बर तियार करे जा सकही।