कलेक्टर अउ एसपी शहीद सम्मान समारोह म होइन सामिल
बलौदाबाजार, बलौदाबाजार जिला के टोनाटार के गांव वाले मन ह अपन शहीद बेटा श्री धनन्जय वर्मा के 10 वां बलिदान दिवस बड़ शान ले मनाए गीस। कलेक्टर श्री कार्तिकेया गोयल अऊ एसपी नीतू कमल विशेष रूप ले ए समारोह म सामिल होइन। हम आप ल बता देवन के साल 2009 म आज ही के दिन बस्तर के उसूर म नक्सली मन ले लोहा लेत शहीद धनंजय ल वीरगति प्राप्त हो गए रहिन। तब ले हर साल 19 जून के दिन गांव वाले मन शहीद सम्मान दिवस मनाथें। शहादत के 10 साल बीत जाय के बाद घलोक शहीद के याद म मनखे मन के आंखी के नमी कम नइ होइस अऊ चेहरा गर्व ले चमकत रहिस।
देश अऊ समाज म सद्भावना के मिसाल हे टोनाटार के ग्रामवासी
सम्मान समारोह म कलेक्टर श्री गोयल ह कहिन कि इहां आके वो खुद ल बहुत गौरवान्वित महसूस करत हें काबर के अइसन पावन भुइंया म शहीद धनंजय ह जनम लीस अऊ पलिस-बढि़स। उमन कहिन कि टोनाटर गाँव आज शहीद धनंजय के नाम ले जाने जाथे। उमन इहां के युवा मन बर कोनो हीरो ले कम नइ हे।उमन कहिन कि गाँव के सियान मन के ये पहल देश अऊ समाज म एक मिसाल हे जिहां जाति धर्म अऊ समुदाय ले ऊपर उठके पूरा गाँव हर साल उंखर शहादत दिवस म सकलाथें। अइसन आयोजन देश अऊ समाज म सद्भावना ल बढ़ाथे। उमन कहिन कि धनंजय जइसे वीर सिपाही के सेती ही आज हम सुरक्षित हन जऊन खुद के जान के परवाह करे बिना देश बर अपन जान के बाजी लगाय रहिस।
उमन ए मौका म शहीद धनंजय के माता श्रीमती केंवरा बाई अऊ पिता श्री दशरथ लाल ल शॉल श्रीफल देके सम्मानित करिन। उमन शहीद के माता के पांव परके उंकर नमन घलोक करिन।
एस पी नीतू कमल ह कहिन कि ऊंखर बर ये पल बहुत भावुक अऊ गौरव ले भरे हे। जिहां एक कोति शहीद धनंजय ह देश बर जान देके ए गाँव के हर मनखे के छाती ल गरब ले चौड़ा करे हे। उन्हें दुसर कोति उनला खोए के दरद घलोक ऊंखर परिवार बर कम नइ हे। फेर ए दरद के बाद घलव ऊंखर परिवार के जज़्बा देखतेच बनत हे।
बाप ल हे बेटा के शहादत उपर नाज
अपन बेटा के सुरता करके श्री दशरथ वर्मा के आंखी भर आईस। उमन बताइन कि ऊंखर दिल म इही चाहत रहिस कि वो सेना म सामिल होके देश के सेवा करय। फेर आर्थिक तंगी के चलत चुन लेहे गे बाद घलोक जबलपुर जाए के बिवस्था नइ हो पात सहिस। फेर उमन तय कर लेहे रहिन कि अपन बेटा ल पुलिस फोर्स या सेना म जरूर भेजहीं, जइसे तईसे उमन पईसा के व्यवस्था करिन। उमन बताइस कि उमन देश बर अपन बेटा कुर्बान कर दीन जऊन म ओ मन ल बहुत नाज़ हे। सम्मान समारोह म जिला भर के शहीद मनल श्रद्धांजलि दे गीस अऊ उंखर सुरता म सब मन 2 मिनट के मौन रखिन। रायपुर ले आए पुलिस बैंड के संग शहीद मन के सम्मान म राष्ट्रीय गान के धुन बजाए गीस।
ए मौका म जिला भर के शहीद मन के परिजन मन ,गाँव के सियान मन, शिक्षक मन, कलाकार मन अउ पत्रकार मन के सम्मान घलोक करे गीस। ए अवसर म श्री राकेश तिवारी के नेतृत्व म देशभक्ति ले परिपूर्ण सांस्कृतिक कार्यक्रम घलोक प्रस्तुत करे गीस। कार्यक्रम के बाद गाँव के सरपंच श्री चंद्रप्रकाश साहू ह गांव के समस्या मन के बारे म कलेक्टर ल ज्ञापन सौंपिन । श्री गोयल ह कहिन कि शहीद के ए गांव के समस्या ल दूर करे बर वो ह हर संभव कोसिस करहीं।