राज्यपाल ह शहीद के परिजन मन ल मदद के दीन आश्वासन
रायपुर, राज्यपाल सुश्री अनुसुईया उइके ले आज इहां राजभवन म शहीद रूद्रप्रताप सिंह के परिजन श्री जवाहर सिंह अऊ श्रीमती गिरीजा सिंह ह सौजन्य मुलाकात करिन। राज्यपाल ह उंखर से कहिन कि श्री रूद्रप्रताप अपन कर्त्तव्य के निर्वहन करत शहीद होइस। अइसन मनखे समाज बर प्रेरणास्रोत होथे। राज्यपाल ह ओ मन ल आश्वस्त करिन कि ऊंखर देहे गे आवेदन म जरूरी कार्यवाही करे जाही। उंखर कुर्बानी ल समाज हमेशा याद रखही। श्री जवाहर सिंह ह राज्यपाल ल बताइस कि ऊंखर सुपुत्र श्री रूद्र प्रताप दंतेवाड़ा जिला के थाना अरनपुर म पदस्थ रहिन। 30 अकटूबर 2018 के मतदान स्थल निरीक्षण के बेरा म दूरदर्शन के टीम ल नक्सली हमला ले बचात वीरगति ल प्राप्त होए रहिन। श्री जवाहर सिंह ह राज्यपाल ले कहिन कि श्री रूद्रप्रताप के शहादत के सम्मान म शासकीय कृषि महाविद्यालय जांजगीर के नामकरण शहीद रूद्रप्रताप सिंह के नाम म करे जाए। एखर संगेच तरौद अऊ अकलतरा के मध्य स्थित नेशनल हाईवे चौक के नामकरण घलोक शहीद रूद्रप्रताप सिंह के नाम म करे जाय अऊ उहां उंखर मूर्ति स्थापित करे जाय। उमन राज्यपाल ले शासकीय उच्चतर माध्यमिक शाला ग्राम-सोनसरी के नामकरण शहीद रूद्रप्रताप सिंह के नाम म करे अऊ उंखर पुत्री कुमारी अपराजिता सिंह ल निःशुल्क शिक्षा प्रदान करे के आग्रह करिन। ये बेरा म ऊंखर आन परिजन उपस्थित रहिन।
