रायपुर 25 जनवरी, 2020। राष्ट्रीय मतदाता दिवस के मौका म निर्वाचन काम म बिक्कट सुग्घर काम करे के खातिर बलौदाबाजार जिला के कसडोल तहसीलदार शंकरलाल सिन्हा ल सम्मानित गीस। राज्य मुख्य सूचना आयुक्त एम.के.राऊत, राज्य निर्वाचन आयुक्त ठाकुर रामसिंह अऊ मुख्य निर्वाचन पदाधिकारी रीना बाबा साहेब कंगाले ह आज राजधानी रायपुर के पंडित रविशंकर शुक्ल विश्वविद्यालय के सभागार म आयोजित राज्य स्तरीय समारोह म ओला प्रशस्ति पत्र देके सम्मानित करिन।
जानबा हे के ये सम्मान बर राज्य के हर एक राजस्व संभाग ले एक राजस्व अधिकारी के चयन करे जाना रहिस। रायपुर संभाग म काम करइया कई सैकड़ा राजस्व अधिकारी मन म ले शंकरलाल सिन्हा के काम ल बहुतेच अच्छा पाए गीस। बलौदाबाजार-भाटापारा जिला वाले मन के कहना हे के जिला बर गौरव के विसय ये। श्री सिन्हा ल ये सम्मान लोकसभा चुनाव के पहिली मतदाता सूची के विशेष संक्षिप्त पुनरीक्षण कार्यक्रम म सहायक पंजीकरण अधिकारी के रूप म उल्लेखनीय काम बर प्रदान करे गीस। कलेक्टर अउर जिला निर्वाचन अधिकारी कार्तिकेय गोयल अउर अपर कलेक्टर जोगेंद्र नायक ह ए उपलब्धि म प्रसन्नता जाहिर करत तहसीलदार शंकरलाल सिन्हा ल बधाई अऊ शुभकामना देहे हें।
