रायपुर, मुख्यमंत्री श्री भूपेश बघेल 23 जून के दिन संझा छै बजे शंकर नगर रेल्वे ओव्हर ब्रिज के लोकार्पण करहीं। शंकर नगर ले वी.आई.पी. कॉलोनी रद्दा के रायपुर-विशाखापटनम् रेल्वे लाईन म करीबन 68 करोड़ रूपिया के लागत ले ए रेल्वे ओव्हर ब्रिज के निर्माण करे गए हे। लोक निर्माण मंत्री श्री ताम्रध्वज साहू कार्यक्रम के अध्यक्षता करहीं। कृषि मंत्री श्री रविन्द्र चौबे, आदिम जाति अउ अनुसूचित जाति विकास मंत्री डॉ. प्रेमसाय सिंह, लोकसभा सांसद श्री सुनील सोनी, राज्यसभा सांसद श्रीमती छइंहा वर्मा, विधायक सर्वश्री सत्यनारायण शर्मा, बृजमोहन अग्रवाल, कुलदीप सिंह जुनेजा, विकास उपाध्याय अऊ नगर निगम रायपुर के महापौर श्री प्रमोद दुबे विशेष अतिथि के रूप म कार्यक्रम म उपस्थित रइहीं।
करीबन 703.03 मीटर लम्बा अऊ 13 मीटर चौड़ा ए ओव्हर ब्रिज शुरू होए ले रेल्वे क्रॉसिंग के दुनों कोति बसे खम्हारडीह, वी.आई.पी कॉलोनी, शंकर नगर, अनुपम नगर, श्री राम नगर, अशोका रतन ले अवईया-जवईया करीबन दू लाख के आबादी लाभान्वित होही। अब मनखे मन बिना कोनो ट्रैफिक जाम के निकल सकही। ओव्हर ब्रिज के चालू होए ले लोधीपारा चौक म अक्सर होवइया ट्रैफिक जाम ले घलोक मनखे मन ल राहत मिलही अऊ शंकर नगर ले बलौदाबाजार मार्ग होत विधानसभा जाय बर सुगम मार्ग मिलही। रेल्वे ओव्हर ब्रिज के शंकर नगर कोति 106 मीटर अऊ व्हीआईपी कॉलोनी के कोति 135 मीटर लम्बा पहुंच मार्ग बनाये गए हे।।
