रायपुर, 4 मार्च, 2024। मुख्यमंत्री श्री विष्णु देव साय आज भिनसरहा राजधानी रायपुर के बोरियाकला स्थित शंकराचार्य आश्रम पहुंचके ज्योतिष पीठ के शंकराचार्य जगदगुरु स्वामी श्री अविमुक्तेश्वरानंद सरस्वती जी अउ शारदा पीठ के शंकराचार्य जगद्गुरु स्वामी सदानंद सरस्वती जी के दर्शन करके उंखर आशीर्वाद लीन। स्वामी जी राजिम कुंभ के संत समागम म भाग लेहे छत्तीसगढ़ पहुंचे हें। एखरे संग ओ मन प्रदेश म होवइया आन धार्मिक कार्यक्रम मन म घलोक संघरहीं।
मुख्यमंत्री श्री साय ह स्वामी जी ल राजिम कुंभ आयोजन के संबंध म जानकारी देवत बताइन कि एखर पइत राजिम कुंभ कल्प के आयोजन बहुत भव्य तरीका ले करे जात हे। देश भर ले इहां संत समागम होय हे। छत्तीसगढ़ के मनखे बड़ भाग्यशाली हे कि ओ मन ल आप मन के आशीर्वाद ए मौका म मिले हे।
मुख्यमंत्री श्री साय ह स्वामी जी ले कहिन कि राजिम कुंभ के माध्यम ले संत समागम के उद्देश्य पूरा होवत हे जेखर से सनातन परंपरा के प्रति मनखे मन के जागरूकता बाढ़ही।
शंकराचार्य जी ह ए मौका म मुख्यमंत्री ल आशीर्वाद दीन। संगेच उमन कहिन कि सनातन परंपरा ल आगू बढ़ाए बर जेन प्रकार ले राजिम कुंभ म तैयारी करे गए हे अऊ संत समागम होय हे ओखर से निश्चित रूप ले छत्तीसगढ़ म आध्यात्मिक वातावरण अऊ उन्नत होही। भगवान श्री राजीव लोचन जी अऊ कुलेश्वर महादेव जी के पुण्य भइंया संगम नगरी राजिम म ये सुंदर आयोजन होवत हे एखर से निश्चित रूप ले श्रद्धालु मन बर उत्साहपूर्ण वातावरण बने हे। ए मौका म खेल अउ युवा कल्याण मंत्री श्री टंकराम वर्मा घलोक मौजूद रहिन।
मुख्यमंत्री श्री विष्णु देव साय ह ज्योतिष पीठ के शंकराचार्य जगद्गुरु स्वामी श्री अविमुक्तेश्वरानंद सरस्वती जी अउ शारदा पीठ के शंकराचार्य जगद्गुरु स्वामी सदानंद सरस्वती जी के करिन दर्शन
