मदकू द्वीप क्षेत्र के विकास के शिल्पी शांताराम ल देहे गीस श्रद्धांजलि

केंद्रीय राज्य मंत्री श्री तोखन साहू, उपमुख्यमंत्री श्री अरुण साव संग बहुत अकन मंत्रीगण आखरी यात्रा म होइन सामिल
रायपुर, मदकू द्वीप क्षेत्र के विकास के शिल्पी अऊ छत्तीसगढ़ के पहिली प्रांत प्रचारक स्वर्गीय श्री शांताराम ल केन्द्रीय राज्य मंत्री श्री तोखन साहू, उपमुख्यमंत्री श्री अरुण साव संग बहुत अकन मंत्री अऊ जनप्रतिनिधि मन ह मदकू द्वीप पहुंचके ओ मन ल श्रद्धांजलि दीन अऊ आखरी यात्रा म सामिल होइन। शांताराम जी के निधन मदकू द्वीप संग पूरा समाज बर अपूरणीय क्षति हे। उंखर स्मृति अऊ आदर्श, भावी पीढ़ी मन ल हमेसा प्रेरणा देवत रइही।
कृषि मंत्री श्री राम विचार नेताम, राजस्व मंत्री श्री टंकराम वर्मा, खाद्य मंत्री श्री दयालदास बघेल, तकनीकी शिक्षा मंत्री गुरू खुशवंत साहेब, पर्यटन मंत्री श्री राजेश अग्रवाल, छ.ग. वक्फ बोर्ड के अध्यक्ष डॉक्टर सलीम राज, विधायक श्री धरमलाल कौशिक, पहिली विधायक श्री गौरी शंकर अग्रवाल, पहिली राज्यपाल श्री रमेश बैस, क्रेडा के अध्यक्ष श्री भूपेंद्र सवन्नी, पहिली विधायक श्री शिवरतन शर्मा, प्रांतीय संघ संचालक श्री टोपलाल संग बहुत अकन जनप्रतिनिधि अऊ गणमान्य नागरिक मन ह श्रद्धांजलि अर्पित करके आखरी यात्रा म सामिल होइन।
जानबा हे के छत्तीसगढ़ के पहिली प्रांत प्रचारक 94 वर्षीय स्वर्गीय श्री शांताराम भारतीय स्टेट बैंक म प्रबंधक के पद ल त्याग करके हिंदू समाज के उत्थान बर राष्ट्रीय स्वयंसेवक संघ के पूर्णकालिक कार्यकर्ता बनिन। संघ म रहत उमन जिला, विभाग, प्रांत प्रचारक अऊ क्षेत्र सम्पर्क प्रमुख जइसे महत्वपूर्ण दायित्व के निर्वहन करिन। साल 1990 म उमन श्री हरिहर क्षेत्र मदकू द्वीप ल विकसित करे के मिशन अपन हाथ म लीन। ऊंखर अथक उदीम मन ले मदकू द्वीप धार्मिक अऊ सांस्कृतिक दृष्टि ले पुनर्जीवित होइस अऊ श्रद्धालु मन अऊ शोधकर्ता मन के प्रमुख केंद्र बनिस।
उमन बैतलपुर के कुष्ठ बस्ती चंदरपुर म शिव मंदिर निर्माण, चिकित्सा सेवा अऊ सामाजिक काम मन के संगे-संग नवागढ़ के शमी गणेश मंदिर के पुनर्निर्माण म घलोक योगदान दीन। उंखर आखरी इच्छा के मुताबिक आज बिहनिया 08 ले 10 बजे तक उंखर पार्थिव शरीर रायपुर स्थित जागृति मंडल म आखरी दर्शन बर रखे गीस। ओखर बाद मंझनिया 01 बजे श्री हरिहर क्षेत्र मदकू म उंखर अंतिम संस्कार करे गीस।