सारंगढ़ के शारदा बाई के जिनगी म उज्ज्वला योजना ले अइस बदलाव, धुंगिया ले मिलिस मुक्ति

CHHATTISgarHI NEWS: सारंगढ़-बिलाईगढ़। रंधनी के धुंगिया अउ लकड़ी सकेले के बुता ले परेशान सारंगढ़ के रंजर पारा के रहवइया श्रीमती शारदा बाई सारथी के जिनगी म प्रधानमंत्री उज्ज्वला योजना ह बड़का बदलाव ले के आए हे। अनुसूचित जाति वर्ग के शारदा बाई के चार सदस्य वाला परिवार मुख्य रूप से खेती करथे। पहिली पारंपरिक चूलहा म खाना चुरोवत बेरा जहरीला धुंगिया ले ओकर आंखी अउ फेफड़ा ला नुकसान होवत रहिस, उहें लकड़ी सकेले अउ गोबर बिन के छेना थोपई म रोजेच अड़बड़ बेरा अउ मेहनत बर्बाद होवत रहिस।
प्रधानमंत्री उज्ज्वला योजना के तहत शारदा बाई ला मुफ्त एलपीजी गैस कनेक्शन, चूल्हा अउ पहिली सिलिंडर मिलिस। एकर से वोकर रंधनी म धुंगिया के जगा नीला लौ जले लगे हे, जिहां खाना पकाए अब बहुत आसान अउ सुरक्षित होगे हे। ए योजना के तहत 14.2 किलोग्राम वाला सिलिंडर म 367 रूपिया के सब्सिडी सीधा वोकर बैंक खाता म जमा होथे, जेकर से परिवार ऊपर आर्थिक बोझ नइ परय अउ उमन आसानी से गैस रिफिल करावत हें। राज्य सरकार के ‘सेवा संकल्प अभियान’ के तहत शारदा बाई के ए सफर एक बड़का मिसाल हे, जे ह बताथे के जन-कल्याणकारी योजना मन गरीब परिवार के जीवनशैली अउ स्वास्थ्य ला कइसे बेहतर बनावत हें। ए बदलाव ह सशक्त अउ सुविधाजनक छत्तीसगढ़ के जीवंत तस्वीर देखाथे।