मुख्यमंत्री विष्णुदेव साय के हुकुम म शारदाधाम पर्यटन स्थल के सूची म होइस सामिल

पर्यटन बोर्ड प्रचार प्रसार अऊ सुविधा विकसित करे म देही सहयोग
श्रद्वा अऊ ज्ञान के अनोखा संगम हे शारदाधाम
रायपुर, छत्तीसगढ़ अऊ झारखण्ड के अंर्तराज्यी सीमा म स्थित प्रसिद्ध धार्मिक अउ प्राकृतिक पर्यटन स्थल शारदाधाम ल मुख्यमंत्री विष्णुदेव साय के निर्देश म छत्तीसगढ़ टुरीज्म बोर्ड ह राज्य के चिन्हाकित पर्यटन स्थल के सूची म सामिल कर लेहे हे। पर्यटन बोर्ड ह एखर बर परिपत्र जारी कर देहे हे। बोर्ड के ए निर्णय ले ए पर्यटन स्थल ल एक नवा पहिचान मिल सकही।  बोर्ड एखर प्रचार-प्रसार के संगेच पर्यटक मन बर मूलभूत सुविधा मन के विकास बर बजट उपलब्‍ध कराही।
श्रद्धा अऊ ज्ञान के संगम हे शारदाधाम
शारदाधाम म विद्यादायनी माँ सरस्वती के श्रद्वा अऊ ज्ञान अर्जन के अनोखा संगम देखे ल मिलथे। इहां छत्तीसगढ़ अऊ झारखंड राज्य के जरूरतमंद लइका मन के रहे अऊ पढ़े बर कोचिंग के विशेष व्यवस्था करे गए हे। शारदाधाम समिति के अध्यक्ष राजकुमार सिंह ह बताइस के ए विशेष कोचिंग संस्था म लइका मन के रहे, खाए के संग उंखर कोचिंग के निःशुल्क व्यवस्था करे गए हे। लइका मन के रहे अऊ कोचिंग के जेन खर्चा हे, ओखर व्यय समिति श्रद्वालु मन के सहयोग ले पूरा करथे।
प्रकृतिक सौंदर्य ले भरपूर हे शारदाधाम प्रसिद्व धार्मिक पर्यटन स्थल
शारदाधाम, जिला मुख्यालय जशपुर ले तकरीबन 30 किलोमीटर दूर, दुलदुला ब्लाक म स्थित हे। माता सरस्वती के ये प्रसिद्व मंदिर चारो कोति घना जंगल ले घिरे हे। नजदीक म गिरमा नदी के कलकल करत मधुर अवाज इहां दर्शन बर अवइया श्रद्वालु मन के मन मोह लेथे। संचालन समिति के अध्यक्ष ह बताइस के विद्यादायनी मां सरस्वती के ये भव्य मंदिर पूरा श्रमदान ले तैयार करे गए हे। दुनों राज्य मन के श्रद्वालु मन ह पसीना बोहा के मां के ए मंदिर के निर्माण करे हे। मंदिर के भवन के डिजाइन झारखंड के प्रसिद्व लचलागढ़ हनुमान मंदिर के तर्ज म तैयार करे गए हे।