लखपति दीदी बने तक के सफर के अनुभव साझा करिन
रायपुर, 02 अकटूबर 2024। जशपुर जिला के बगीचा विकासखंड अंतर्गत ग्राम कुटमा निवासी मनकुंवारी बाई झारखंड के हजारी बाग म 2 अकटूबर के पीएम जन-मन के मेगा इवेंट म सामिल होए पहुंचे हे। ए बेरा म पहाड़ी कोरवा मनकुंवारी बाई ह आज आदिम जाति कल्याण विभाग के केंद्रीय मंत्री श्री जुएल उरांव ले मिलके पीएम जन-मन योजना ले मिलइया लाभ के बारे म जानकारी दीस। श्रीमती मनकुंवारी ह बताइस के उंखर तक प्रधानमंत्री आवास योजना, बिजली, पानी, संग आन सुविधा पहुंचत हे। वो ह कहिस के विशेष पिछड़ी जनजाति पहाड़ी कोरवा परिवार समाज के मुख्य धारा ले जुड़के आगू बढ़त हे। ए बेरा म वो ह केन्द्रीय मंत्री ल जशपुर जिला के महिला मन कोति ले तैयार करे गए स्थानीय उत्पाद के टुकनी घलोक भेंट करिस। मंत्री श्री उरांव ह समूह के महिला मन के काम ल अड़बड़ सहराईन अऊ अपन शुभकामना दीन।
जानबा हे कि प्रधानमंत्री श्री नरेन्द्र मोदी के विशेष पहल म विशेष पिछड़ी जनजाति मन के सर्वांगीण विकास बर पीएम जनमन योजना संचालित करे जात हे। मुख्यमंत्री श्री विष्णु देव साय विशेष पिछड़ी जनजाति परिवार तक शासन के सबो योजना मन के लाभ पहुचाए के हुकुम सरकारी अधिकारी करमचारी मन ल देहे हे। जशपुर जिला म पहाड़ी कोरवा परिवार ल पीएम जन-मन योजना के लाभ देहे जात हे।