बारनवापारा अभ्यारण्य अउ सीमावर्ती वनक्षेत्र म घूमत बघवा अउ वन्यप्राणी मन के सुरक्षा अउ निगरानी खातिर चरवाहा सम्मेलन के होइस आयोजन
बलौदाबाजार, 29 अगस्त 2024। पाछू 06 महिना ले जिला बलौदाबाजार-भाटापारा के अंतर्गत विचरण करत बघवा के संरक्षण अउ संवर्धन बर काली वनमंडल स्तरीय चरवाहा मन के एक दिन के सम्मेलन सह कार्यशाला बारनवापारा अभ्यारण्य म आयोजन करे गीस। कार्यशाला म उपवनमंडलाधिकारी कसडोल आई.एफ.एस अक्षय दिनकर भोसले ह पावर पॉइंट प्रजेंटेशन के माध्यम ले बाघ के व्यवहार अउ आन गतिविधि मन के बारे म बारीकी ले परखर जानकारी दीन। बघवा विचरण क्षेत्र म होवत गतिविधि, ट्रैकिंग के संबंध म निरधारित स्टैंडर्ड आपरेटिंग प्रोसीजर अउ विचरण क्षेत्र म कई प्रकार के वन्यप्राणी मन के खान-पान अऊ व्यवहार के बारे म विस्तार ले चर्चा करके जानकारी देहे गीस।
वनमण्डलाधिकारी बलौदाबाजार मयंक अग्रवाल ह बताइन के मॉनिटरिंग बर वनमण्डल अंतर्गत 250 ट्रैप कैमरा के मदद ले बाघ विचरण के सरलग निगरानी करे जात हे। बाघ के सुरक्षा बर विशेष स्थानीय गांव वाले मन के मदद ले बाघ निगरानी दल बनाए गए हे। वनक्षेत्र म कोनो प्रकार ले जनहानि, जनघायल, पशुहानि, फसल हानि, अउ आन सम्पत्ति के क्षति होए म तुरंत सूचित करे अउ अवैध शिकार अउ वन्यप्राणी मन के जानकारी प्राप्त होए म तुरंत वन विभाग ल सूचित करे बर कार्यशाला म उपस्थित चरवाहा अउ गांव वाले मन ले अपील करे गीस।