गार्डन निर्माण म भ्रष्टाचार के शिकायत के जांच के निर्देश
रायपुर, मुख्यमंत्री श्री भूपेश बघेल ह आज इहां अपन निवास म आयोजित जन -चौपाल, भेंट मुलाकात के कार्यक्रम म बेमेतरा जिला के बेरला तहसील के ग्राम गोड़गिरी म चारागाह के जमीन म अतिक्रमण के शिकायत ल गंभीरता ले लेहे हें। उमन जिला कलेक्टर ल ये शिकायत के जांच करके अतिक्रमण हटाए के कार्यवाही तुरंत सुनिश्चित करे के निर्देश दीए हें। गांव वाले मन के प्रतिनिधि मंडल ह मुख्यमंत्री ले मुलाकात करके ओ मन ल बताइन कि गांव के चारागाह के जमीन म अतिक्रमण होए के सेती पशु मन बर गांव म चारागाह नइ हे, एखर से गांव वाले मन ल परेशानी होवत हे। गांव म दशहरा के तिहार धूमधाम ले मनाया जाथे, फेर दशहरा मैदान म घलोक अतिक्रमण होय हे। अइसनहे गौठान के जमीन घलोक अतिक्रमण ले अछूता नइ हे। मुख्यमंत्री ह जिला कलेक्टर ल ए शिकायत मन के जांच करके जरूरी कार्रवाई करे निर्देश जारी करे हें।
जनचौपाल म जिला मुख्यालय मुंगेली के नवागढ़ रोड स्थित एक गार्डन के निर्माण म घलोक भ्रष्टाचार के शिकायत सामने आईस। नगर वासी मन ह मुख्यमंत्री ल आवेदन देके बताइन कि ये गार्डन के निर्माण बर एक करोड़ 59 लाख रुपए के राशि मंजूर होए रहिस। नगर पालिका परिषद कोति ले पूरा राशि आहरित कर ले गीस फेर गार्डन के पूरा निर्माण काम नइ कराए गीस। अभी हाल म गार्डन खंडहर के स्थिति म हे। मुख्यमंत्री ह ये शिकायत के जांच घलोक जिला कलेक्टर ल करे के निर्देश जारी करे हें।
