शिक्षा ले ही साधे जा सकथे जिनगी के लक्ष्य : मुख्यमंत्री दाउ भूपेश बघेल

रइपुर, 23 मई 2021 इतवार। मुख्यमंत्री दाउ भूपेश बघेल ह अपन घरू कार्यालय म आयोजित प्रतिभा सम्मान समारोह के वर्चुअल कार्यक्रम म माध्यमिक शिक्षा मंडल के बछर 2019 अउ बछर 2020 के 10वीं अउ 12वीं बोर्ड परीक्षा म प्रावीण्य सूची म जगा पवइया 159 मेधावी छात्र-छात्रा अउ विशेष पिछड़ी जनजाति के प्रतिभावान छात्र-छात्रा मन ल स्वामी आत्मानंद मेधावी छात्र प्रोत्साहन योजना के अंतर्गत चिनहा अउ बड़ई —पत्र प्रदान करके सम्मानित करीन। स्वामी आत्मानंद मेधावी छात्र प्रोत्साहन योजना के अंतर्गत प्रावीण्य सूची म जगा पवइया विद्यार्थी मन ल 1.50 लाख रूपिया के राशि दिये जाथे।
मुख्यमंत्री दाउ भूपेश बघेल ह प्रतिभा सम्मान समारोह के ये बेेरा ल अबड़े गौरवशाली बतावत कहिन कि शिक्षा ले ही जिनगी के ल पाए जा सकथे। एकर ले जिनगी ल सकारात्मक दिशा मिलथे। आप सबो झिन देश अउ प्रदेश के भविष्य हरौ। ज्ञान-विज्ञान, कला, संस्कृति, प्रशासन के संगे संग जम्मो क्षेत्र म विकास के नवा रद्दा गढ़ौ। मुख्यमंत्री ह ए बेरा म जम्मो विद्यार्थी मन ले एकक करके उन्कर पारिवारिक पृष्ठभूमि अउ उन्कर लक्ष्य के बारे म जानाकारी लेवत कहीन कि प्रदेश सरकार प्रतिभावान छात्र-छात्रा मन के बने अउ उंच शिक्षा बर मदद करत हे अउ करते रहिही। आपमन बने मन लगाकेे पढ़ौ अउ सफल होके दाई —ददा अउ छत्तीसगढ़ के नाम जगावव। उन मन बच्चा मन ल पढ़ई के संगे-संग बने संगत अउ अच्छा आचार-विचार ल अपनाए के सीख दीन।
स्कूल शिक्षा मंत्री डाॅ. प्रेमसाय सिंह टेकाम ह प्रावीण्य सूची म जगा पवइया प्रतिभावान विद्यार्थी मन ल बधई अउ शुभकामना दीन। उन्मन आसरा जताइन कि प्रतिभावान विद्यार्थी राज्य के विकास अउ सामाजिक उत्थान म अपन योगदान देंही। ये मौका म अपर मुख्य सचिव श्री सुब्रत साहू, प्रमुख सचिव स्कूल शिक्षा डाॅ. आलोक शुक्ला, संचालक लोक शिक्षण श्री जितेन्द्र शुक्ला के संगे संग जम्मोे जिला कलेक्टर, शिक्षा मण्डल के सदस्य, जिला शिक्षा अधिकारी अउ प्रावीण्य सूची म जगा पवइया विद्यार्थी वीडियो काॅन्फ्रेंसिंग के माध्यम ले संघरीन।