प्रधानमंत्री आवास योजना ले पक्का मकान के सपना होवत हे पूरा : शिशुपाल मंडावी के सपना होइस पूरा

राजांदगांव, 21 दिसम्बर 2023। प्रधानमंत्री आवास योजना ले कई मनखे मन के पक्का मकान के सपना पूरा होवत हे अपन खुद के पक्का मकान पाके मनखे मन म खुशी के लहर साफ दिखत हे। हर मनखे के अपन एक सपना होथे के वोकर मूड़ उपर एक पक्का छत रहय ताकि अपन परिवार के संग हंसी खुशी वोकर जिन्दगी व्यतीत हो सकय। शिशुपाल मंडावी घलोक उही म ले एक हे, जऊन डोंगरगांव विकासखंड के ग्राम अरसीटोला के निवासी हे।
शिशुपाल मंडावी के आर्थिक स्थिति वोतका अच्छा नइ रहिस, कि वो अपन कच्चा घर ल पक्का मकान म बदल पाए। बड़ मुश्किल ले दू जुवार के रोटी वो ह जोगाड़ पात रहिस, पूरा परिवार के जिम्मेदारी शिशुपाल उपर रहिस। शिशुपाल मंडावी ह बताइस कि वो कई बछर ले कच्चा मकान म रहत रहिस। बरसात के बेरा म ओ ल काफी परेशानि के सामना करना परत रहिस। प्रधानमंत्री आवास योजना ले वो लाभान्वित होइस। आवास योजना के तहत मिले राशि ले ओखर पक्का मकान बनके तियार हो गीस। प्रधानमंत्री के उदीम ले वोखर पक्का मकान के सपना साकार होइस अऊ वो अब पक्का आशियाना म खुशी-खुशी निवास करत हे। वो ह प्रधानमंत्री श्री नरेन्द्र मोदी के प्रति धन्यवाद ज्ञापित करे हे।