रायपुर, छत्तीसगढ़ विधानसभा के शीतकालीन सत्र के समापन म विधानसभा अध्यक्ष डॉ. चरणदास महंत ह कहिन कि सत्र के समय कई ठन विषय मन म विस्तृत अऊ परिणाममूलक चर्चा होईस। उमन सत्र के सुचारू संचालन म सदन के नेता मुख्यमंत्री श्री भूपेश बघेल, नेता प्रतिपक्ष संग पक्ष अऊ विपक्ष के सबो सदस्य मन कोति ले देहे गए सहयोग बर धन्यवाद दीन। उमन कहिन कि सदस्य मन के राजनीतिक प्रतिबद्धता अलग-अलग हो सकत हे, फेर उंखर भावना छत्तीसगढ़ के विकास, लोकहित अऊ लोक कल्याण बर समर्पित हे। विधानसभा अध्यक्ष ह कहिन कि 26 नवम्बर ल संविधान दिवस म सदन म होए चर्चा म सदस्य मन ह अपन विचार रखिन, जेखर से संविधान के संबंध म हमर जानकारी अऊ जादा बाढ़िस, 28 नवम्बर के छत्तीसगढ़ी राजभाषा दिवस म विधानसभा के कार्रवाई के संचालन छत्तीसगढ़ी म करे गीस। शीतकालीन सत्र के समय दूसर अनुपूरक बजट पारित करे गीस अऊ विधानसभा के उपाध्यक्ष के निर्वाचन होइस। उमन कहिन कि सत्र के समय विनियोग संग 8 विधेयक पारित होइस। सत्र के समय 4870 मनखे मन ह अऊ 1430 पढ़ईया लईका मन ह विधानसभा के कार्रवाई के अवलोकन करिन। ये सत्र के समय 6 बैठक होईस, जऊन म 30 घंटा तक चर्चा होईस।
प्रतिपक्ष के नेता श्री धरमलाल कौशिक ह कहिन कि शीतकालीन सत्र भले छोटिक रहिस फेर ये मा जरूरी काम मन होइस। सदस्य मन ल जनता के हित मन ल रखे के बनेच अवसर मिलीस। उमन एखर बर विधानसभा के अध्यक्ष अऊ मुख्यमंत्री के प्रति आभार व्यक्त करिन।
ये बेरा म समापन सत्र ल विधायक श्री धरमजीत सिंह अऊ श्री केशव चन्द्रा ह घलोक संबोधित करिन। श्री धरमजीत सिंह ह कहिन कि सत्र के समय बिलासपुर ल हवाई सेवा ले जोड़े के न सिरिफ अशासकीय संकल्प पारित करे गीस भलुक सदन के नेता मुख्यमंत्री श्री भूपेश बघेल ह 27 करोड़ रूपिया के राशि के प्रावधान करे के घोषणा घलोक करिन।
