कोरोना संक्रमण के ये चुनौतीपूर्ण घड़ी म काम करइया स्वच्छता कर्मी मन के करे जाही सम्मान
रायपुर, 11 अप्रैल 2020। नगरीय प्रशासन अऊ श्रम मंत्री डॉ. शिवकुमार डहरिया ह काली नगर निगम रायपुर के सभाकक्ष म कोरोना वायरस के संक्रमण के फैलाव ल रोके बर मजबूती ले अउ सरलग साफ-सफाई के काम म लगे स्वच्छता कर्मी मन ल सम्मानित करिन। सम्मान स्वरूप ओ मन ल राशन अउ आन जरूरी सामान प्रदान करे गीस। जानबा हे के राजधानी रायपुर के समता कॉलोनी म पहिली कोरोना पॉजिटिव पाये जाय के बाद जिहां आम नागरिक मन के उहां जाय के हिम्मत नइ होत रहिस, अइसन चुनौतिपूर्ण घड़ी म काम करइया स्वच्छता कर्मी सुश्री निशा सेन्दरे, सुश्री नैना अऊ श्री अरचू हंस ल साहसपूर्ण काम करे बर सम्मानित करे गीस। अइसनहे देवेन्द्र नगर म कोरोना पॉजिटिव के प्रकरण पता चले म उहां मजबूती के संग स्वच्छता काम म लगे सुश्री लता नायस, सुश्री गायत्री सोनी अऊ श्री चन्द्रप्रकाश ल घलोक सम्मानित करे गीस। अइसनहे अहमद जी कॉलोनी म कोरोना पॉजिटिव के प्रकरण पता चले के बाद ओ क्षेत्र म हिम्मत के संग साफ-सफाई काम म सरलग लगे सुश्री लता ध्रुव, श्री सुदर्शन अऊ श्री राकेश ल घलोक राशन अउ आन सामान प्रदान करके सम्मानित करे गीस। ये मौका म विशेष रूप ले विधायक श्री सत्यनारायण शर्मा, नगर निगम रायपुर के महापौर श्री एजाज ढेबर, सभापित श्री प्रमोद दुबे मौजूद रहिन।
