शिवरीनारायण अऊ राहौद म ‘सेवा मेरा योगदान’ अभियान, श्रमदान करके जल स्रोत मन के करे गीस सफाई

CHHATTISGARHI NEWS: जांजगीर-चांपा , छत्तीसगढ़ शासन के सेवा संकलप अभियान के तहत ‘सेवा मेरा योगदान’ पहल के अंतर्गत जनभागीदारी ले जल स्रोत मन ला स्वच्छ अऊ सुरक्षित रखे के संदेश देहे जात हे। इही कड़ी म जांजगीर-चांपा जिला के शिवरीनारायण अऊ राहौद म तालाब मन के साफ-सफाई बर विशेष अभियान चलाए गीस। जनप्रतिनिधि, नागरिक अऊ अधिकारी-कर्मचारी मन सामूहिक श्रमदान करके तालाब अऊ आसपास के क्षेत्र के सफाई करिन अऊ जल तथा पर्यावरण संरक्षण म अपन भागीदारी निभाइन।
नगर पंचायत शिवरीनारायण के वार्ड क्रमांक पन्द्रा स्थित बटुआ तालाब अऊ नगर पंचायत राहौद के वार्ड क्रमांक चउदा स्थित नागमचा तालाब म आयोजित ए अभियान के दौरान बड़ संख्या म लोगन मन श्रमदान करिन। ए बेरा म तालाब मन ला प्रदूषण ले बचाए अऊ स्वच्छ बनाए रखे बर नागरिक मन ला प्रेरित करे गीस। अभियान म जल संरक्षण के संग सिंगल यूज प्लास्टिक ले होवइया पर्यावरणीय नुकसान के प्रति घलो लोगन मन ला जागरूक करे गीस। नागरिक मन ले प्लास्टिक के उपयोग कम करे, पर्यावरण-अनुकूल विकल्प अपनाए अऊ पानी के विवेकपूर्ण उपयोग करे के अपील करे गीस।
सामूहिक श्रमदान के माध्यम से ये संदेश देहे गीस के स्वच्छता, जल संरक्षण अऊ पर्यावरण के सुरक्षा सिरिफ कोनो एक विभाग के जिम्मेदारी नो हे। समाज के हर एक व्यक्ति के सक्रिय भागीदारी ले ही जल स्रोत मन ला स्वच्छ रखे के प्रयास ला स्थायी बनाए जा सकत हे। ए कार्यक्रम म नगर पंचायत शिवरीनारायण अध्यक्ष राहुल थवाईत, राहौद अध्यक्ष प्रतिभा कश्यप, उपाध्यक्ष गयाराम चंदेल सहित जमो पार्षद, स्थानीय जनप्रतिनिधि अऊ नागरिक मन उपस्थित रहिन।