श्रम विभाग कोति ले घर पहुँच के देहे जात हे योजना के लाभ

मोहला-मानपुर-अंबागढ़, मुख्यमंत्री श्री विष्णु देव साय के अगुवाई म प्रदेस सरकार कोति ले श्रमिक मन अउ उंखर परिवार के भलाई बर अलग-अलग योजना चलाय जात हे। इही कड़ी म श्रम विभाग के तहत चलइया छ.ग. भवन अऊ आन सन्निर्माण कर्मकार कल्याण मंडल म “मुख्यमंत्री निर्माण श्रमिक मृत्यु अऊ दिव्यांग सहायता योजना“ के तहत पंजीकृत श्रमिक के मउत के बाद ओकर सही उत्तराधिकारी या नामिनी ला योजना म मिलइया एक लाख रुपया के लाभ देहे जात हे। मोहला-मानपुर-अंबागढ़ चौकी जिला म विभाग कोति ले एक अभियान चला के ए योजना के तहत पीड़ित परिवार मन के घर पहुँच के जांच करे जात हे अउ ओमन ला लाभ देहे जात हे। निर्माण श्रमिक, असंगठित मजदूर अउ ओमन के परिवार ला दुख के बखत म आर्थिक मदद देना ए योजना के उदेस आय।
अम्बागढ़ चौकी विकासखंड के ग्राम सोनसायटोला के पंजीकृत मजदूर स्व. श्री शम्भू राम के मउत के बाद ए पईसा ह ओकर उत्तराधिकारी फिरंतिन बाई के खाता म भेज देहे गीस। योजना के तहत पंजीकृत निर्माण श्रमिक के सामान्य मउत म 1 लाख रुपया, काम के ठउर म दुर्घटना ले मउत होय म 5 लाख रुपया, काम के ठउर म दुर्घटना ले हमेशा बर दिव्यांग होय म 2 लाख 50 हजार रुपया अउ अपंजीकृत निर्माण श्रमिक के काम के ठउर म दुर्घटना ले मउत होय म 1 लाख रुपया के मदद देहे जाथे।
ए योजना के लाभ पाय बर निर्माण श्रमिक के हिताधिकारी के रूप म भवन अउ आन निर्माण काम म कम से कम 90 दिन पहिली के पंजीयन होना जरूरी हे। आवेदन मंजूर होय के बाद योजना के पईसा डी.बी.टी. (DBT) के माध्यम ले नामिनी या उत्तराधिकारी के खाता म भेज देहे जाथे। ए योजना के लाभ लेहे बर ऑनलाइन आवेदन के बखत पंजीयन प्रमाण पत्र, आधार कार्ड, बैंक पासबुक, पंजीकृत मजूर अउ नामिनी के आधार कार्ड, पता के प्रमाण, मोबाइल नंबर, मृत्यु प्रमाण पत्र या दिव्यांगता के प्रमान पत्र अपलोड करना जरूरी होही। विभाग कोति ले मजदूर मन ला योजना के लाभ देवाय बर पंचायत स्तर म पंजीयन अउ नवीनीकरण के कार्य शिविर लगा के सरलग करे जात हे, जेकर से मजदूर मन ला सामाजिक सुरक्षा मिल सकय अउ ओमन के जिनगी ह सुग्घर बन सकय।