भिनसरहा होतेच मिलत हे भरपेट खाना, रोजी म जाए बर नइ होवय देरी : शहीद वीर नारायण सिंह श्रम अन्न योजना ले मजदूर मन के मिटत हे भूख

रायपुर 08 मार्च 2021। संतोषी नगर के दिलीप दीप होवय या पेंशनबाड़ा के बबलू खान, भिलाई के योगेश होवय या नवापारा राजिम म रहइया राधे तांडी। ये सबो श्रमिक यें। इंकर दिनचर्या के शुरुआत बिहनिया 5 ले 6 बजे ही शुरू हो जाथे। भलेच ए मजदूर मन ल रात म सुते के पहिली दूसर दिन म काम मिले के चिंता रहीथे, फेर ओ मन ल ये बात के गारंटी रथे कि काली भिनसरहा उमन खाली पेट नइ रइहीं। मजदूर जानथें के चावड़ी म काम धंधा मिले के झन मिलय, ओ मन ल भरपेट भोजन जरूर मिलही। निरधारित स्थान म बहुत कम दर म भोजन मिले ले मजदूर मन ल भिनसरहा घर म भोजन के चिंता नइ रहय। एखर से ओ मन ल अपन काम म जाय म घलोक देरी नइ होवय। मुख्यमंत्री श्री भूपेश बघेल अऊ श्रम मंत्री डॉ शिवकुमार डहरिया के निर्देशन म श्रम विभाग कोति ले संचालित शहीद वीर नारायण सिंह श्रम अन्न योजना हजारों गरीब मजदूर मन बर वरदान साबित होवत हे।