कबीरधाम, राज्य सरकार के जन-कल्याणकारी नीति मन के असर अब जमीनी स्तर मं साफ दिखत हे। समाज कल्याण विभाग के एक बड़का पहल ले कबीरधाम जिला के कवर्धा नगर (वार्ड नंबर 2) के रहइया श्री माखन निर्मलकर के जिनगी मं नवा अंजोर आए हे। अड़बड़ दिन ले भैरा होए के समस्या ले जूझत श्री निर्मलकर ला 31 दिसंबर 2025 के समाज कल्याण विभाग कोति ले श्रवण-यंत्र (सुने के मशीन) देहे गीस, जेकर से ओकर जिनगी पूरा बदल गे हे।
मशीन लगे ले बाढ़िस आत्मविश्वास
श्रवण-यंत्र पाय के बाद श्री निर्मलकर के सुने के सामरथ मं बड़का सुधार होए हे। अब ओ ह साफ-साफ गोठ-बात ला सुन पात हे अउ अपन परिवार, परोसी अउ समाज के मनखे मन ले अराम से बात करत हे। सुने के ए नवा सुविधा ले ओकर आत्मविश्वास फेर जाग गे हे अउ ओ ह अब आम मनखे मन जइसे जिनगी बिता पात हे।
समाजिक दूरी ले मिलिस छुटकारा
श्री माखन निर्मलकर ह बताइस के कम सुनाई देहे के सेती ओला रोज के काम-काज अउ समाजिक मेल-मिलाप मं बड़ अड़चन आवत रहिस। मनखे मन ले गोठियाय मं ओला लाज लगय अउ ओ ह अपने-आप ला सबले अलग-थलग महसूस करय। फेर अब मशीन मिले ले ओकर सुने के समस्या त दूर होइसेच, ओ ह मानसिक रूप ले घलो अपने-आप ला मजबूत महसूस करत हे।
शासन अउ विभाग के आभार
श्री निर्मलकर ह सरकार अउ समाज कल्याण विभाग के आभार जताइस अउ कहिस के ए मदद ले ओला सम्मान अउ आत्मनिर्भरता के नवा सहारा मिले हे। दिव्यांग मन ला श्रवण-यंत्र जइसे सहायक समान देना सरकार के मानुख सोच अउ समावेशी विकास ला देखाथे। ए पहल ले दिव्यांग मनखे मन समाज के मुख्यधारा ले जुड़के बिसवास के संग जिनगी जी पावत हें।