- छत्तीसगढ़ के पहिली मुख्यमंत्री श्री अजीत जोगी के निधन : मुख्यमंत्री श्री भूपेश बघेल ह गहरा दुख व्यक्त करिस
- छत्तीसगढ़ सरकार ह श्री जोगी के निधन म तीन दिन के राजकीय शोक घोषित करिस
- राष्ट्रीय ध्वज आधा झुके रइही, कोनो शासकीय समारोह आयोजित नइ होवय
- स्वर्गीय श्री जोगी के राजकीय सम्मान के संग 30 मई के गौरेला म होही अंतिम संस्कार
रायपुर, 29 मई 2020। मुख्यमंत्री श्री भूपेश बघेल ह छत्तीसगढ़ के पहिली मुख्यमंत्री श्री अजीत प्रमोद कुमार जोगी के निधन म गहरा दुःख प्रकट करे हें। श्री जोगी के आज इहां एक निजी चिकित्सालय म इलाज के समय निधन हो गीस। मुख्यमंत्री श्री बघेल ह श्री जोगी के निधन म राज्य म आज ले तीन दिन के राजकीय शोक घोषित करे हें। ये दौरान राष्ट्रीय ध्वज आधा झुके रहिही अऊ कोनो शासकीय समारोह आयोजित नइ होवय। स्वर्गीय श्री जोगी के अंतिम संस्कार पूरा राजकीय सम्मान के संग काल 30 मई के गौरेला म होही।
मुख्यमंत्री श्री बघेल ह अपन शोक संदेश म कहे हें के श्री जोगी के निधन छत्तीसगढ़ बर अपूरणीय क्षति हे। उमन प्रदेश के विकास म श्री जोगी के योगदान ल सुरता करत कहिन के राज्य बने के बाद उमन छत्तीसगढ़ राज्य के तीव्र विकास के रूपरेखा तियार करिन अऊ एक कुशल राजनीतिज्ञ अउ प्रशासक के रूप म राज्य ल आगू बढ़ाए म महत्वपूर्ण भूमिका अदा करिन। मुख्यमंत्री श्री बघेल ह कहिन के छत्तीसगढ़ राज्य निर्माण के बाद श्री जोगी के नेतृत्व म बने सरकार म केबिनेट मंत्री के रूप म काम करे के मौका मिलीस। उमन कहिन के श्री जोगी ह छत्तीसगढ़ राज्य म गांव, गरीब अऊ किसान मन के कल्याण बर काम करे के दिशा निरधारित करिन।
मुख्यमंत्री श्री भूपेश बघेल ह स्वर्गीय श्री जोगी के परिजन मन के प्रति गहिर संवेदना व्यक्त करत ओ मन ल ये दुख के घड़ी ल सहन करे के शक्ति प्रदान करे अऊ दिवंगत आत्मा के शांति बर ईश्वर ले प्रार्थना करे हें। जानबा हे के श्री जोगी बीते 9 मई के उपचार बर चिकित्सालय म भर्ती रहिन। पूर्व मुख्यमंत्री श्री अजीत जोगी इंजीनियरिंग के पढ़ाई पूरा करे के बाद प्राध्यापक के रूप कैरियर के शुरूआत करे रहिन। पहिली आई.पी.एस. के रूप म अपन सेवा दीन तेकर बाद भारतीय प्रशासनिक सेवा बर चुने गीन। अविभाजित मध्यप्रदेश के समय रायपुर संग कई जिला के जोगी जी कलेक्टर रहिन। श्री जोगी सांसद, विधायक घलोक रहिन। एक नवंबर 2000 के छत्तीसगढ़ राज्य बनिस त ओ मन राज्य के पहिली मुख्यमंत्री बने रहिन।
