महासमुंद 4 जनवरी 2024। भारत सरकार के संयुक्त सचिव श्री अमिताभ कुमार शाह दू दिवसीय दौरा म महासमुंद पहुंचिन। ये बेरा म उमन विकसित भारत संकल्प यात्रा म पहुंचके हितग्राही मन ले रूबरू होके योजना मन के क्रियान्वयन के जानकारी लीन। उमन शिविर म लगे स्टॉल के अवलोकन करत कई ठन योजना मन के हितग्राही मन ले चर्चा करिन। श्री शाह बुधवार के महासमुंद विकासखण्ड अंतर्गत ग्राम बेलटुकरी, अछोला अऊ बिरसपत ल बागबाहरा विकासखण्ड अंतर्गत ग्राम लमकेनी म आयोजित शिविर के जायजा लीन। ये बेरा म कलेक्टर श्री प्रभात मलिक जिला पंचायत सीईओ श्री एस. आलोक, वनमंडलाधिकारी श्री पंकज राजपूत, अनुविभागीय अधिकारी श्री उमेश साहू अउ जनपद सीईओ श्रीमती मिशा कोशले मौजूद रहिन।
श्री शाह ह शिविर म मोदी के गारंटी वाले प्रचार रथ के घलोक अवलोकन करिन। कलेक्टर श्री प्रभात मलिक ह बताइस कि जिला म निरधारित रूट के मुताबिक शिविर के आयोजन करे जात हे। जेन अवइया 26 जनवरी तक चलही। शिविर म उज्ज्वला योजना अंतर्गत पात्र हितग्राही मन ल फॉर्म भरवाए जात हे अउ ओखर लाभ देवाए जात हे। अइसनहे आधार कार्ड, आयुष्मान कार्ड घलोक शिविर के समय ही बनाए जात हे।
श्री शाह ह स्टॉल अवलोकन के बेरा म कई झन हितग्राही मन ले चर्चा घलोक करिन। ग्राम लमकेनी म उड़ान महिला समूह के श्रीमती मानमोती ले उमन चर्चा करिन अऊ ऊंखर बैंक लिंकेज, लाभ, उत्पादन आदि के विस्तार ले जानकारी लीन। मेरी कहानी मेरी जुबानी अंतर्गत समूह के मानमोती ह बताइस कि ओ ल हर महिना करीबन 12 ले 15 हजार रुपिया के आमदनी होवत हे। बैंक ले ओ ल एक लाख रुपिया के करजा घलोक मिले हे। अइसनहे ग्राम बेलटुकरी म डेरहिन कोशले ह बताइस कि वोला पहिली डिलिवरी बर निजी अस्पताल जाना परिस फेर आयुष्मान कार्ड के सेती इलाज हो गे। एखर से मोला बहुत सहायता मिलीस। अइसनहे महिला समूह के ज्ञान बाई ह बताइस कि ओखर समूह 3 लाख लोन लेके टेंट, सब्जी बाड़ी के अपन काम शुरू करिस। आज ओ ह स्वावलंबी हे। उषाबाई ह बताइस कि जब ले उज्ज्वला योजना अंतर्गत गैस मिलीस तब ले जल्दी खाना बन जात हे। अब धुवां ले मुक्ति मिलीस। अइसनहे उमन ग्राम कनेकेरा व अछोला म घलोक हितग्राही मन ले चर्चा करिन। श्री शाह ह स्थानीय जनप्रतिनिधि मन ले घलोक शिविर के संबंध म जानकारी लीन।
