मुख्यमंत्री श्री विष्णु देव साय ह अयोध्या म भण्डारे के संचालन बर कार्यकर्ता मन के टीम ल झंडी देखा के करिन रवाना

रायपुर, 24 जनवरी 2024। मुख्यमंत्री श्री विष्णु देव साय ह आज राजधानी रायपुर स्थित श्री राम मंदिर परिसर ले श्रीराम के जन्मभूमि अयोध्या म भण्डारा के संचालन बर कार्यकर्ता मन के टीम ल झंडी देखा के अयोध्या बर रवाना करिन। मुख्यमंत्री श्री साय ह मंदिर म दर्शन करके प्रदेशवासी मन के सुख-समृद्धि अउ खुशहाली खातिर प्रार्थना करिन।
ए बेरा म मुख्यमंत्री श्री साय ह कहिन कि आज हम सब बर एक विशेष अवसर हे। भगवान श्रीराम के ननिहाल छत्तीसगढ़ ले राम भक्त कार्यकर्ता अऊ रसोईया मन के टीम राम दर्शन बर अयोध्या अवइया श्रद्धालु मन ल भण्डारा भोज कराए खातिर रवाना होइन। भगवान श्रीराम के ही कृपा हे कि 22 जनवरी के छत्तीसगढ़ के भांचा भगवान राम अयोध्या म कई बछर तक टेंट म रहे के बाद विधि-विधान ले विराट मंदिर म विराजमान होइन। श्रीराम मंदिर म आयोजित भव्य प्राण प्रतिष्ठा समारोह हमार देश के यशस्वी प्रधानमंत्री श्री नरेन्द्र मोदी के करकमल ले देश भर ले अयोध्या पहुंचे संत, महात्मा मन के उपस्थिति म संपन्न होइस। जेखर लाइव प्रसारण हम सब मन देखेन। ये अतका अद्भुत दृश्य रहिस। हमार भांचा श्रीराम के अलौकिक बाल विग्रह के आलोक देखतेच बनत रहिस।
ए अवसर म स्वास्थ्य मंत्री श्री श्याम बिहारी जायसवाल, महिला अउर बाल विकास मंत्री श्रीमती लक्ष्मी राजवाड़े, सांसद श्री सुनील सोनी, विधायक श्री पुरंदर मिश्रा, विधायक श्री संपत अग्रवाल, विधायक गुरू श्री खुशवंत साहेब, विधायक श्री मोतीलाल साहू, एखर कार्यक्रम के सहसंयोजक श्रीमती लक्ष्मी वर्मा, राइस मिलर्स एसोसिएशन के अध्यक्ष श्री योगेश अग्रवाल संग श्रद्धालु बड़ी संख्या म उपस्थित रहिन।