रजत जयंती साल म सांस्कृतिक चेतना ल नवा उड़ान: ‘श्री रामलला दर्शन योजना’ अंतर्गत रायपुर ले विशेष ट्रेन होइस रवाना

श्री रामलला दर्शन योजना के अंतर्गत रायपुर ले 850 श्रद्धालु मन के तीर्थयात्रा बर प्रस्थान — मुख्यमंत्री श्री विष्णु देव साय ह दीन शुभकामना
रायपुर, छत्तीसगढ़ सरकार कोति ले प्रदेशवासी मन के आस्था अऊ श्रद्धा ल मूर्त रूप देहे बर चालू करे गए ‘श्री रामलला दर्शन योजना’ के अंतर्गत आज रायपुर रेलवे स्टेशन ले रायपुर संभाग के 850 श्रद्धालु विशेष ट्रेन ले अयोध्या धाम के दर्शन बर रवाना होइन। ए पवित्र यात्रा के शुभारंभ म मुख्यमंत्री श्री विष्णु देव साय ह श्रद्धालु मन ल हार्दिक शुभकामना दीन अऊ उंखर यात्रा के मंगलमयी होए के कामना करिन।
मुख्यमंत्री श्री साय ह कहिन कि श्रद्धालु मन ल हमार ‘भांचा राम’ — श्रीरामलला के निःशुल्क दर्शन कराए के ये पुण्य यात्रा सरलग जारी हे। ये यात्रा प्रधानमंत्री श्री नरेंद्र मोदी जी के ओ गारंटी ल साकार करत हे, जेमां उमन देश के हर एक नागरिक ल प्रभु श्रीराम के दर्शन के अवसर उपलब्ध कराए के संकल्प ले रहिन।
उमन कहिन के “श्री रामलला दर्शन योजना” के अंतर्गत सरकार ह मार्च 2024 तक 20,000 श्रद्धालु मन ल अयोध्या धाम भेजे के लक्ष्य निरधारित करे रहिस, फेर प्रदेशवासी मन के अद्वितीय आस्था, उत्साह, अऊ सरकार के प्रतिबद्धता के चलते ये संख्या 22,000 ले जादा हो गे हे। ए यात्रा म श्रद्धालु मन ल काशी विश्वनाथ धाम के दर्शन के सौभाग्य घलोक प्राप्त होवत हे।
मुख्यमंत्री श्री साय ह कहिन के वित्तीय साल 2025-26 म ए योजना बर ₹36 करोड़ के बजट स्वीकृत करे गए हे। अब तक बीते डेढ़ बछर म 27 विशेष ट्रेन छत्तीसगढ़ के कई ठन संभाग मन ले श्रद्धालु मन ल लेके अयोध्या धाम बर रवाना होए हे।
मुख्यमंत्री ह कहिन के श्री रामलला तीर्थ दर्शन योजना केवल एक धार्मिक यात्रा न ही, बल्कि छत्तीसगढ़ के सांस्कृतिक चेतना ल सशक्त करे के दिशा म एक ऐतिहासिक पहल हे। सरकार के उद्देश्य हे के प्रदेश के हर नागरिक, विशेषकर बुज़ुर्ग अऊ वंचित वर्ग, अपन जीवन म एक बार प्रभु श्रीराम के जन्मस्थान के दर्शन कर सकंय।