राजस्व मंत्री श्री टंक राम वर्मा ह ट्रेन ल हरी झंडी देखाके करिन रवाना
श्रद्धालु काशी विश्वनाथ के घलोक करहीं दर्शन
रायपुर, 27 अगस्त 2024। मुख्यमंत्री श्री विष्णुदेव साय के पहल म शुरू करे गए श्री रामलला दर्शन योजना के तहत चलाए जात विशेष ट्रेन आज रायपुर रेल्वे स्टेशन के प्लेटफार्म नंबर-07 ले रवाना होइस। राजस्व मंत्री श्री टंक राम वर्मा ह हरी झंडी देखा के ट्रेन ल रवाना करिन। ए विशेष ट्रेन ले 850 श्रद्धालु मन के जत्था अयोध्या धाम बर रवाना होइस। ए यात्रा ले श्रद्धालु मन म भारी उत्साह हे। श्रद्धालुगण भगवान राम के जय-जयकार करत अयोध्या धाम बर रवाना होइन। ट्रेन म श्रद्धालु भजन-कीर्तन करत भक्तिमय माहौल म श्री रामलला के दर्शन बर जावत हें।
ए बेरा म विधायक श्री मोतीलाल साहू, पूर्व विधायक श्रीमती रंजना डीपेन्द्र साहू, श्री नन्दे साहू, पूर्व अध्यक्ष सीएसआईडीसी श्री छगनलाल मुंदड़ा संग जनप्रतिनिधिगण उपस्थित रहिन।
रामलला दर्शन बर जवइया दर्शनार्थि मन ह कहिन कि मुख्यमंत्री श्री विष्णुदेव साय ह श्री रामलला दर्शन बर योजना के शुरूआत करे हे। एखर बर मुख्यमंत्री के बहुत-बहुत धन्यवाद। अयोध्या के दर्शन हम जइसे मनखे मन बर मुस्कल रहिस, फेर मुख्यमंत्री के पहल म आज हमर बर अयोध्या म श्री रामलला के दर्शन के संयोग बने हे। आज अयोध्या बर रवाना होवत हमला बहुत खुशी होवत हे। अयोध्या म श्री रामलला के भव्य अऊ सुंदर मंदिर बनाय गे हे। श्री रामलला के दर्शन बर यात्रा ले बहुत खुशी होवत हे। यात्रा के समय हम सबो ल काशी विश्वनाथ जी के दर्शन के लाभ घलोक प्राप्त होही। यात्रा ल लेके यात्रि मन म उत्साह के माहौल देखे गीस।