दुरिहा इलाका के सरधालु मन ला मिलिस अयोध्या धाम के सुभाग, मुख्यमंत्री ह कहिन — इही आय जनसेवा के प्रेरणा

कोरिया, मुख्यमंत्री श्री विष्णु देव साय ह कोरिया प्रवास के बखत झुमका जलाशय परिसर म ‘श्री रामलला दर्शन योजना’ के तहत अयोध्या धाम के पावन जात्रा ले लहुटे सरधालु मन ले मयारू भेंट करिन। मुख्यमंत्री ह सरधालु मन के हाल-चाल जानिन अउ ओमन के आध्यात्मिक अउ भक्तिमय अनुभव मन ला बड़े धियान ले सुनिन। सरधालु मन ह मुख्यमंत्री ला बताइन के छत्तीसगढ़ सासन के सहयोग ले ओमन ला मुफत म अयोध्या धाम के दरसन करे के सुभाग मिलिस। ओमन कहिन के सासन कोति ले मान-सनमान के संग जात्रा के बढ़िया बेवस्था करे जाय ले ए जात्रा ओमन बर बहुते सहज अउ कभू नइ भुलाय वाला बन गे।
सरधालु मन ह बताइन के अपन दुरिहा गाँव ले अयोध्या तक पहुँचना उमन बर पहिली मुस्किल रहिस, फेर सरकार के ए पहल ह एला संभव कर दीस। सरधालु मन ह मुख्यमंत्री श्री साय ला ‘हमारे राम’ तैलचित्र भेंट करके आभार जताइन।
मुख्यमंत्री श्री विष्णु देव साय ह सरधालु मन के उत्साह बढ़ावत कहिन के परभू श्रीराम छत्तीसगढ़ के भांचा अंय अउ परदेस के मनखे मन ला ओकर दरसन कराना सासन बर सुभाग के बात आय। ओमन कहिन के दुरिहा अंचल मन म रहइया मनखे मन तक योजना मन के लाभ पहुँचाना ही जनसेवा के असली संतोस आय, अउ सरकार इही भावना के संग काम करत हे।