नक्सल विरोधी अभियान के सफलता म दीन बधाई
रायपुर, 15 मई 2025/ मुख्यमंत्री श्री विष्णु देव साय आज बीजापुर जिला के उसूर तहसील के अंदरूनी गांव गलगम पहुंचिन। उमन सीआरपीएफ के जवान मन अऊ स्थानीय गांव वाले मन ले मुलाकात करके नक्सल विरोधी अभियान के सफलता उपर गोठ-बात करिन। ए अभियान म सुरक्षा बल मन ह करेगुट्टा के पहाड़ी म 21 दिन तक चले ऑपरेशन म 31 कुख्यात माओवादी आतंकी मन ल मार गिराए हें अऊ अबड़ अकन हथियार बरामद करे हें। मुख्यमंत्री साय ह ए अभियान ल नक्सल मुक्त छत्तीसगढ़ के लक्ष्य कोति एक महत्वपूर्ण कदम बताइन।
मुख्यमंत्री श्री साय ह भारत माता अऊ छत्तीसगढ़ महतारी के जयकारा के संग उद्बोधन के शुरुआत करिन। उमन कहिन के हमार जवान मन ह अदम्य साहस अऊ समर्पण के संग ए ऑपरेशन ल सफल बनाय हें। ये न केवल बीजापुर भलुक पूरा राज्य बर एक बड़का उपलब्धि ये। गलगम अऊ करेगुट्टा के क्षेत्र लंबा समय ले नक्सली मन के गढ़ माने जात रहे हे अऊ ए अभियान ह ए इलाका ल सुरक्षित बनाए के दिशा म नवा उम्मीद जगाए हे। सीआरपीएफ जवान मन ले मुलाकात के समय श्री साय ह ऊंखर साहस के सराहना करिन अऊ कहिन कि आप मन के शौर्य अऊ निष्ठा ले ही हम नक्सलवाद के खिलाफ ए लड़ाई ल जीतत हन।
ए अवसर म मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध कुमार सिंह, बस्तर रेंज आईजी श्री सुंदरराज पी., डीआईजी श्री कमलोचन कश्यप, कलेक्टर श्री संबित मिश्रा, पुलिस अधीक्षक डॉ. जितेन्द्र यादव संग बहुत अकन वरिष्ठ अधिकारी अऊ सुरक्षा बल मन के जवान उपस्थित रहिन।
