मुख्यमंत्री ह सिकलसेल ले जूझत आयुष अऊ आयुषि के सहायता बर बढ़ाइन हाथ

रायपुर, 06 मार्च 2024। सिकल सेल के गंभीर बीमारी ले जूझत दू मासूम लइका मन ल बीमारी ले राहत देवाए बर मुख्यमंत्री विष्णुदेव साय ह पहल करे हें। मुख्यमंत्री के हुकुम म स्वास्थ्य विभाग के चिरायु शाखा पीड़ित लइका मन के स्वास्थ्य के जांच म जुटे हे। जिला के कांसाबेल तहसील के खूंटीटोली के निवासी दुर्गावती चौहान अपन दुनों लइका आयुष चौहान 5 साल अऊ आरूषि चौहान 2 साल ल लेके बगिया स्थित सीएम कैम्प पहुंचे रहिस। इहां वो ह मुख्यमंत्री विष्णुदेव साय ल बताइस कि वोखर दूनो लइका सिकलसेल ले पीड़ित हे। ओ मन ल सरलग दवा अऊ खून के जरूरत परथे। फेर आर्थिक तंगी के सेती, इलाज म परेशानी के सामना करना परत हे। सीएम साय ह दुर्गावती के परेशानी ल गंभीरता ले लेत,सीएमएचओ डॉ. आर.एस. पैंकरा ल पीड़ित लइका मन के समुचित इलाज के व्यवस्था करे के निर्देश दीन।
चिरायु के नोडल अधिकारी डॉ. अरविन्द रात्रे ह बताइस कि सिकलसेल जन्म ले होवइया अनुवांशिक बीमारी हे। उमन बताइन कि मुख्यमंत्री विष्णुदेव साय के निर्देश के पालन करत सिकलीन पीड़ित दुनों लइका मन ल सबो प्रकार के सहायता देहे जात हे। उमन ल विशेषज्ञ चिकित्सक के सहायता घलोक उपलब्‍ध कराए जाही।