- दुर्ग जिला के बिरेभांठ म स्थापित होही ये इकाई
- कई सशस्त्र सेना-थल सेना, बीएसएफ, सीआरपीएफ अऊ राज्य सरकार के सशस्त्र बल मन बर करे जाही बुलेटप्रूफ जैकेट अऊ हेलमेट के उत्पादन
- कम्पनी ह करीबन 87.50 करोड़ रूपिया के करही पूंजी निवेश
- 150 मनखे मन ल मिलही रोजगार
- पहिली चरण म एक-एक लाख बुलेटप्रूफ जैकेट अऊ हेलमेट के होही उत्पादन
रायपुर, 17 अगस्त 2020। मुख्यमंत्री श्री भूपेश बघेल के उपस्थिति म आज छत्तीसगढ़ म रक्षा श्रेणी के उद्योग के पहली उत्पादन इकाई के स्थापना बर एमओयू म हस्ताक्षर करे गीस। ये औद्योगिक इकाई भारत सरकार के कई ठन सशस्त्र सेना जइसे थल सेना, बीएसएफ, सीआरपीएफ अऊ राज्य सरकार के सशस्त्र बल मन बर बुलेटप्रूफ जैकेट अऊ हेलमेट के उत्पादन करही।
मुख्यमंत्री निवास म आयोजित एक संक्षिप्त समारोह म छत्तीसगढ़ शासन के उद्योग विभाग अऊ रक्षा उत्पाद के औद्योगिक इकाई स्थापित करइया कम्पनी मेसर्स एटमास्टको लिमिटेड, दुर्ग के बीच एमओयू म हस्ताक्षर करे गीस। उद्योग मंत्री श्री कवासी लखमा घलोक ये बेरा म उपस्थित रहिन। रक्षा उत्पाद मन के ये इकाई छत्तीसगढ़ के दुर्ग जिला के बिरेभांठ गांव म स्थापित करे जाही। ये इकाई म कम्पनी कोति ले करीबन 87.50 करोड़ रूपिया के पूंजी निवेश करे जाही। ये उद्योग के माध्यम ले करीबन 150 मनखे मन ल रोजगार मिलही। पहिली चरण म रक्षा उत्पाद के ये औद्योगिक इकाई एक-एक लाख बुलेटप्रूफ जैकेट अऊ हेलमेट के उत्पादन करही। मुख्यमंत्री श्री बघेल ह ये इकाई के स्थापना बर मेसर्स एटमास्टको लिमिटेड अऊ उद्योग विभाग के अधिकारी मन ल बधाई अऊ शुभकामना दीन।
एमओयू म उद्योग विभाग के प्रमुख सचिव श्री मनोज कुमार पिंगुआ अऊ मेसर्स एटमास्टको लिमिटेड के एम.डी. श्री एस स्वामीनाथन ह हस्ताक्षर करिन। प्रमुख सचिव श्री पिंगुआ ह बताइस के छत्तीसगढ़ सरकार के नवा औद्योगिक नीति म रक्षा श्रेणी के उद्योग मन ल जादा प्राथमिकता श्रेणी म रखे गए हे। छत्तीसगढ़ म स्थापित होवइया ये पहिली इकाई बर डीआरडीओ ले तकनीकी बर अनुबंध करे गए हे। मेसर्स एटमास्टको लिमिटेड के एम.डी. श्री एस स्वामीनाथन ह बताइस के ये इकाई म नवम्बर तक उत्पादन चालू हो जाही।
ये बेरा म मुख्य सचिव श्री आर.पी. मण्डल, अपर मुख्य सचिव श्री सुब्रत साहू, प्रमुख सचिव उद्योग श्री मनोज कुमार पिंगुआ, मुख्यमंत्री के सचिव श्री सिद्धार्थ कोमल परदेशी, सचिव सामान्य प्रशासन डॉ कमलप्रीत सिंह, संचालक, उद्योग श्री अनिल टुटेजा, सीएसआईडीसी के प्रबंध संचालक श्री अरूण कुमार संग वाणिज्य अउर उद्योग विभाग के विशेष सचिव श्री व्ही.के.छबलानी, मुख्यमंत्री सचिवालय म उप सचिव सुश्री सौम्या चौरसिया, निवेशक मन म मेसर्स एटमास्टको लिमिटेड के एम.डी. श्री एस स्वामीनाथन, डायरेक्टर श्री वेंकटारमन, वाईस प्रेसीडेंट श्री के.एल.बालासुब्रमणियम उपस्थित रहिन। मेसर्स एटमास्टको लिमिटेड, दुर्ग एक प्रतिष्ठित इकाई हे, जऊन पाछू 35 साल ले कार्यरत हे। ये इकाई म अभी हाल म हैवी फेब्रीकेशन जइसे ब्रिज आदि के निर्माण होथे अऊ ये मां करीबन 600 मनखे ल रोजगार मिले हे।
