मुख्यमंत्री ले वर्ल्ड कराटे चैंपियनशिप म सिल्वर मेडल विजेता सुश्री स्नेहा बंजारे ह करिस सौजन्य मुलाकात

रायपुर, 28 फरवरी 2024। मुख्यमंत्री श्री विष्णु देव साय ले काली इहां राज्य अतिथि गृह पहुना म वर्ल्ड कराटे चैंपियनशिप, दुबई म सिल्वर मेडल विजेता सुश्री स्नेहा बंजारे ह सौजन्य मुलाकात करिस। मुख्यमंत्री श्री साय ह संयुक्त अरब अमीरात म आयोजित वर्ल्ड कराटे चैंपियनशिप म सिल्वर मेडल जीते म सुश्री बंजारे ल बधाई अऊ शुभकामना दीन। मुख्यमंत्री ह कहिन कि अंतर्राष्ट्रीय स्तर म देश अउ प्रदेश के प्रतिनिधित्व करत ये उपलब्धि हासिल करना गौरवान्वित करे वाला हे। एखर से प्रदेश के मान बाढ़े हे।
मुख्यमंत्री श्री साय ह कहिन कि आप के सफलता ले प्रदेश के बेटी मन ल घलोक प्रेरणा मिलही अऊ कराटे खेल म लड़की मन आगू आहीं। बेटी मन ह सदैव मिथकों ल तोड़े के काम घलोक करे हें। हर क्षेत्र म बेटी मन ह अपन क्षमता के लोहा मनवाए हें। उमन खिलाड़ी सुश्री बंजारे ले प्रतियोगिता के बारे म जानकारी लीन। संगेच प्रतियोगिता म जीते मेडल पहिरा के अऊ प्रशस्ति पत्र देके सम्मानित करिन।
जानबा हे कि यूएई म आयोजित विश्व कराटे चैंपियनशिप म कोरबा जिला के स्नेहा बंजारे ह सीनियर वर्ग के 68 किलो ग्राम वर्ग म रजत पदक जीते हे। प्रतियोगिता म विश्व के 84 देश के खिलाड़ी मन ह भाग ले रहिन। भारत ले 49 खिलाड़ी मन के चयन होइस, जेमां छत्तीसगढ़ ले एक मात्र खिलाड़ी के रूप म स्नेहा के चयन होए रहिस। स्नेहा अपन वर्ग म 11 देश के प्रतिभागी मन ल हराके फाइनल म पहुंचे रहिन। फाइनल म ओखर मुकाबला मिस्त्र के खिलाड़ी ले होइस अऊ वो ह रजत पदक हासिल करिस। स्नेहा अभी हाल म गुरुघासीदास विश्वविद्यालय म एमपीएड फाइनल ईयर के छात्रा हे। बतौर खिलाड़ी स्नेहा ह अनेक पदक जीते हे ।