मुख्यमंत्री श्री भूपेश बघेल के विशेष प्रयास ले सुपोषण अभियान ल मिलीस बड़का सफलता
रायपुर, छत्तीसगढ़ म सरकार गठन के तुरंते बाद मुख्यमंत्री श्री भूपेश बघेल ह प्रदेश ले कुपोषण ल समूल खतम करे बर विशेष अभियान चलाय के घोषणा करे रहिन। मुख्यमंत्री के घोषणा के तुरंते बाद दंतेवाड़ा जिला म सबले पहिली सुपोषण अभियान शुरू करे गीस। महात्मा गांधी के 150वां जयंती 2 अकटूबर 2019 ले पूरा प्रदेश म कुपोषण अभियान चालू करे गीस। मुख्यमंत्री श्री बघेल ह दंतेवाड़ा संग जादा कुपोषित जिला मन म प्रवास के समय सुपोषण अभियान के समीक्षा करत रहिन हें। मुख्यमंत्री ह छेरछेरा पुन्नी के दिन ओ मन ल दान म मिले राशि अऊ धान ल सुपोषण अभियान बर समर्पित करे हें। मुख्यमंत्री के हुकुम म बस्तर क्षेत्र म सुपोषण बर गुड़ के वितरण घलोक शुरू करे गए हे।
मुख्यमंत्री श्री भूपेश बघेल के कुपोषण मुक्ति के दिशा म करे विशेष प्रयास ले कुपोषण मुक्ति अभियान म उल्लेखनीय उपलब्धि बर देश के 115 आकांक्षी जिला मन म ले दन्तेवाड़ा जिला ल मुख्यमंत्री सुपोषण अभियान ल कारगर ढंग ले क्रियान्वयन करे बर नई दिल्ली के इंडिया हैबीटेट सेंटर म आयोजित स्कॉच अवार्ड समारोह म प्रधानमंत्री श्री नरेन्द्र मोदी के आर्थिक सलाहकार श्री विवेक देवराय कोति ले सिल्वर अवार्ड प्रदान करे गीस। दंतेवाड़ा जिला प्रशासन के तरफ ले ये अवार्ड ल जिला पंचायत दन्तेवाड़ा के मुख्य कार्यपालन अधिकारी श्री सच्चिदानंद आलोक अऊ आकांक्षी फैलो श्री बसन्त कुमार ह ग्रहण करिन। ये अवार्ड देश के 115 आकांक्षी जिला मन के श्रेणी म सुपोषण अभियान ल बेहतर ढंग ले संचालित करे के संग उल्लेखनीय उपलब्धि हासिल करे बर दन्तेवाड़ा जिला ल प्रदान करे गीस।
हम आप ल बता देवन कि प्रदेश के मुख्यमंत्री श्री भूपेश बघेल के घोषणा के संगेच सुपोषण अभियान ल कलेक्टर श्री टोपेश्वर वर्मा के मार्गदर्शन म दन्तेवाड़ा जिला म सबले पहिली चालू करे गीस। जिला म सुपोषण अभियान ल ग्राम पंचायत मन के माध्यम ले महिला समूह मन के सहभागिता ले संचालित करे जात हे। जिला म कुपोषण अऊ एनीमिया ल जड़मूल ले खतम करे के उद्देश्य ले सुरू ये महत्वाकांक्षी सुपोषण अभियान के जरिये अब लक्षित लइका मन अऊ माता मन म आशातीत बदलाव आए हे अऊ मुख्य रूप ले लो बर्थ वेट म आशाजनक वृद्धि हो गए हे, जऊन नवजात लइका मन म बढ़के करीबन 3 किलोग्राम हो गए हे। उहें लक्षित लइका मन संग माता अऊ किशोरी बालिका मन म हीमोग्लोबिन के वृद्धि होए हे। एखरे संगेच लइका मन के सेहत म सुधार होय हे।
