सिमगा, बेमेतरा पुलिस ह शिवनाथ नदिया म कूदके अपन जान देवइया बड़े गुरूजी के लास ल बरामद कर लेहे हे। ओखर लास बोहावत-बोहावत सिमगा तक पहुंच गए रहिस। खुदकुशी करे के कारण अभी तक परखर नइ हो सके हे। पुलिस ल एक सुसाइड नोट घलोक मिले हे, जेमें अपन मर्जी ले जान देहे के बात लिखे गए हे।
जानबा हे के पुलिस ल सूचना मिले रहिस के एक मनखे ह टेमरी ले सिमगा के बीच गुजरइया शिवनाथ नदिया म कूद देहे हे। पुलिस मौका म पहुंचिस त उहां फटफटी खड़े मिलीस। लास के तलाशी म एक डायरी बरामद होए हे, जेखर से पता चलिस के नदिया म कूदइया के नाव सुदर्शन प्रसाद कोसरिसा उम्मर 55 साल रहिस जे ह ग्राम बेलारी म बड़े गुरूजी रहिस। बेमेतरा थाना प्रभारी प्रेमप्रकाश अवधिया ह बताइस के नदिया म बहाव तेज होए के सेती अड़बड़ खोजे के बाद घलोक ओखर कुछ पता नइ चल ससे रहिस। बिरसपत के दिन सिमगा के खल्हाती नदिया कोति लास ऊफले के जानकारी मांझी मन ले मिले रहिस। एखर बाद शव के शिनाख्त होइस। थानेदार अवधिया के बताती फटफटी के बेग ले एक सुसाइड नोट घलोक बरामद होय हे। जेमें प्रधान पाइक ह खुदकुशी बर खुद ल जिम्मेदार बताए हे। संगेच लिखे हे के कोनो ल कोनो तकलीफ होए होही त ओखर बर माफी मांगत हंव।
बड़े गुरूजी ह करिस खुदकुशी, शिवनाथ नदी म मिलीस लास
